ޔޫކްރޭންގެ މައްސަލައާ ގުޅޭ ގޮތުން ރައީސް ވްލަޑިމިއާ ޕޫޓިން އާއި އެމެރިކާގެ އިންތިހާބީ ރައީސް ޑޮނަލްޑް ޓްރަމްޕު ފޯނުން ވާހަކަ ދެއްކެވިކަމަށް ބުނާ ރިޕޯޓާ ގުޅިގެން ރަޝިޔާއިން އެ ވާހަކަ ދޮގު ކޮށްފިއެވެ. ކްރެމްލިންގެ ތަރުޖަމާނު ވިދާޅުވީ، ހުޅަނގުން މަޝްވަރާތަކަށް ތައްޔާރަށް ހުރިކަމުގެ އެއްވެސް ނިޝާނެއް ނުފެންނަ ކަމަށެވެ.
ވޮޝިންޓަން ޕޯސްޓުން އާދީއްތަ ދުވަހު ބުނެފައިވަނީ ޓްރަމްޕާއި ޕޫޓިން ބުރާސްފަތި ދުވަހު ފޯނުން ވާހަކަ ދައްކަވައި ޔުކްރެއިން ހަމަނުޖެހުން އިތުރަށް ބޮޑު ނުކުރެއްވުމަށް ޕޫޓިނަށް ޓްރަމްޕް ދެންނެވި ކަމަށެވެ.
ޓްރަމްޕްގެ ވެރިކަމުގައި ކިއެވްއަށް އެމެރިކާއިން ކުރިން ދިން ފަދަ ދީލަތި އެހީއެއް ދީފާނެތޯއާ މެދު ސުއާލު އުފެދެއެވެ.
ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވަނީ ވޮޝިންޓަން ޕޯސްޓުން ރިޕޯޓުކޮށްފައިވާ ޓްރަމްޕް ޕޫޓިންގެ ފޯން ކޯލަކީ ނުހިނގާ ކަމެއް ކަމަށް ވިދާޅުވެފައެވެ.
ޓްރަމްޕްގެ ކޮމިއުނިކޭޝަންސް ޑިރެކްޓަރު ސްޓީވަން ޗެއުންގް އޭއެފްޕީއަށް ދެއްވި ބަޔާނެއްގައި ވިދާޅުވީ ރައީސް ޓްރަމްޕާއި ދުނިޔޭގެ އެހެން ލީޑަރުންނާ ދެމެދު ކުރާ އަމިއްލަ ކޯލްތަކާ ގުޅޭ މައުލޫމާތު ހާމަ ކުރުމަށް ހަމަޖެހިފައި ނުވާ ކަމަށެވެ.
ޔޫކްރޭންގެ ރިޔާސީ ގަނޑުވަރުގެ އިސް އޮފިޝަލަކު ވެސް ވިދާޅުވީ ޕޫޓިން އާއި ޓްރަމްޕާ ދެމެދު އެއްވެސް ގުޅުމެއް އޮތްކަމެއް ކިއެވް އަށް "އަންގާފައި ނުވާ" ކަމަށެވެ. އަދި ޓްރަމްޕް ޕޫޓިންއަށް ފޯނުން ގުޅުއްވުމަށް ކިއެވްގެ ހުއްދަ ހޯދާކަށްވެސް ނުޖެހެއެވެ.
