ނެދަލެންޑްސްގައި ހުންނަ ޔަހޫދީ އެންޓި ޒަޔަނިސްޓް ޖަމިއްޔާއެއް ކަމަށްވާ އެރެވް ރާވްގެ ބޯޑު މެމްބަރު އަނާ ޖޯސެފް ވަނީ ނޮވެމްބަރު ހަތް ވަނަ ދުވަހު ޔޫއެފާ ޔޫރޮޕާ ލީގުގެ މެޗުގައި އަޔަކްސް އާއި މެކާބީ ޓެލް އަވީވް ބައްދަލު ކުރި މެޗުގައި ޒަޔަނިސްޓުން ހިންގި އަނިޔާވެރި ހާދިސާތަކުގެ ޒިންމާ ޒަޔަނިސްޓް އިޒްރޭލުގެ ސަޕޯޓަރުންގެ ބޮލުގައި އަޅުވާފަ އެވެ.
އިޒްރޭލަށް ފާޑުކިޔުންތައް އަމާޒު ކުރަމުން ޖޯސެފް ބުނީ އެކަމުގައި ކުށްވެރިވާނީ ޒަޔަނިސްޓު ޔަހޫދުން ކަމަށެވެ. އަދި ނެދަރލެންޑްގެ ސަރުކާރުން އެކަމުގައި ފިޔަވަޅު އެޅީވެސް ނުބައިކޮށް ކަމަށެވެ.
އޭނާ ބުނީ، އިޒްރޭލާއި ޔަހޫދީ ދީނަކީ ތަފާތު ދެބައެއް ކަމަށެވެ.
"އިޒްރޭލާއި ޔަހޫދީ ދީނަކީ ތަފާތު ދެ ކޮންސެޕްޓްތަކެއް. އިޒްރޭލަކީ އެކި ދީންތަކާއި ނަސްލުތައް ހިމެނޭ ދައުލަތެއް. ޔަހޫދީ ދީނަކީ ދީނެއް. މި ދެ ކަން މައްސުނި ކުރުމުން ފަލަސްތީނުގެ ހައްގުތަކަށް ތާއީދުކުރާ މީހުންނަށް ނުރައްކާވާނެ،" ޖޯސެފް ބުންޏެވެ.
ޖޯސެފް ބުނި ގޮތުގައި ޒަޔަނިސްޓުންގެ އަނިޔާވެރި ހާދިސާތައް ފެށިގެން އައީ މެކާބީގެ ސަޕޯޓަރުން އެމްސްޓަޑަމްއަށް އައިސް ނުލަފާ އަރުވަން ފެށުމުންނެވެ. "އިޒްރޭލުގެ ސަޕޯޓަރުން މުދަލަށް ގެއްލުންދީ، ފަލަސްތީނުގެ ދިދަތައް ވީދާލައި އަންދާލައި، ޓެކްސީ ޑްރައިވަރަކަށް ހަމަލާދީ ހެދި. އާންމު ދަތުރުފަތުރުގައި ނަސްލީ ތަފާތުކުރުމާއި ނަސްލު ނައްތާލުމަށް ތާއީދުކޮށް ޝިއާރުތައް ގޮވަމުން ދިޔަ" ޖޯސެފް ބުންޏެވެ.
މި ހާދިސާތަކުގެ ސަބަބުން އެމްސްޓަޑަމްގައި ތިބި ފަލަސްތީނާއި މުސްލިމުންނާއި އެހެނިހެން ބައިމަދު މައިނޯރިޓީތަކަށް ރައްކާތެރިކަމެއް ނެތްކަން އިހުސާސް ކުރެވުނުކަން އެކަމަނާ ފާހަގަކުރި އެވެ.
ކަމާބެހޭ މަސްއޫލު ފަރާތްތަކަށް ރިޕޯޓްތައް ލިބުނު ނަމަވެސް، ޒަޔަނިސްޓުންގެ އެ ހަމަނުޖެހުން ހުއްޓުވުމަށް އެއްވެސް ފިޔަވަޅެއް އަޅާފައި ނުވާ ކަމަށް ވެސް ޖޯސެފް ބުންޏެވެ.
