ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރު މުހައްމަދު ޔޫނުސް އާއި އިތުރު 61 މީހަކާ ދެކޮޅަށް ރޯމް ސްޓޭޓޫޓްގެ 15 ވަނަ މާއްދާގެ ދަށުން ނެދަލެންޑްސްގައި ހުންނަ އިންޓަނޭޝަނަލް ކްރިމިނަލް ކޯޓު (އައިސީސީ) އަށް ޝަކުވާއެއް ހުށަހަޅައިފި އެވެ. އެ މައްސަލަ ހުށަހެޅީ އަވާމީ ލީގުގެ ލީޑަރެއް ކަމަށްވާ އަދި ސިޔަލަހެޓްގެ ކުރީގެ މޭޔަރު އަންވަރުއްޒާމާން ޗައުދަރީ އެވެ.
އަވާމީ ލީގުގެ ރަސްމީ ފޭސްބުކް ޕޭޖުގައި އާންމުކުރި ވީޑިއޯ މެސެޖެއްގައި ޗައުދަރީ ވަނީ އޮގަސްޓް މަހުގެ ފަސް ވަނަ ދުވަހުން ފެށިގެން އަށް ވަނަ ދުވަހުގެ ނިޔަލަށް ޔޫނުސް އާއި އޭނާގެ ބައިވެރިން "އަނިޔާވެރި ނަސްލު ނައްތާލުމާއި އިންސާނިއްޔަތާ ދެކޮޅަށް ޖަރީމާތައް" ހިންގާފައިވާ ކަމަށް ތުހުމަތު ކުރައްވާފަ އެވެ.
އެ ޝަކުވާގައި ބުނެފައި ވަނީ ދަރިވަރުން އިސްވެ ކުރިއަށް ގެންދިޔަ މުޒާހަރާތަކުގައި އަވާމީ ލީގުގެ މެމްބަރުންނާއި ދީނީ ބައިމަދު މައިނޯރިޓީތައް ކަމަށްވާ ހިންދޫންނާއި، ކްރިސްޓިއަނުން، ބުޑިސްޓުން އަދި ބަންގްލަދޭޝް ފުލުހުންނަށް ހަމަލަތައް އަމާޒުކޮށްފައިވާ ކަމަށެވެ. އަދި އެ މުޒާހަރާތަކުގެ ސަބަބުން އިންޑިއާއަށް ފިއްލަވައިގެން ވަޑައިގަތުމަށް ބޮޑުވަޒީރު ޝެއިޚް ހަސީނާ އަށް މަޖުބުރުކޮށް، އޭނާ ވެރިކަމުން ދުރުކޮށް، ޔޫނުސްގެ ވެރިކަމުގައި ވަގުތީ ސަރުކާރެއް ގާއިމް ކުރެވުނު ކަމަށެވެ.
ޗައުދަރީ ވިދާޅުވީ ގާތްގަނޑަކަށް 800 ޞަފްޙާގެ ހެކި އައިސީސީއަށް ހުށަހަޅާފައިވާނެ ކަމަށެވެ. އަދި ރިޕޯޓްތައް ބުނާ ގޮތުގައި ކިޔަވާ ކުދިންގެ ހަމަނުޖެހުމުގެ އަސަރު ކުރި އެހެން ފަރާތްތަކުގެ ހެއްކާއެކު އިތުރު 15،000 ޝަކުވާ ހުށަހެޅުމުގެ ތައްޔާރީތައް ވެސް ކުރިއަށްދާ ކަމަށެވެ.
ބަންގްލަދޭޝްގައި ހަމަނުޖެހުން ބޮޑުވީ ދަރިވަރުންގެ މުޒާހަރާތައް ވަރުގަދަވެ، ފުލުހުންނާއި ސިފައިންނަށް މުޒާހަރާ ކުރި މީހުންނަށް އަނިޔާކޮށް 600 އަށް ވުރެ ގިނަ މީހުން މަރުވާން މެދުވެރިވުމުންނެވެ.
