އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ރިޕަބްލިކަން ޕާޓީގެ ސެނެޓަރު މާކޯ ރޫބިއޯ ސެކްރެޓަރީ އޮފް ސްޓޭޓްގެ މަގާމަށް އައްޔަން ކުރެއްވުމަށް ތައްޔާރަށް ހުންނެވި ކަމަށް ނިއުޔޯކް ޓައިމްސްއިން ބުނެފިއެވެ.
ރިޕޯޓުތައް ބުނާ ގޮތުން ޓްރަމްޕް އަދި މިކަން ނިންމަވާފައެއް ނުވެއެވެ. އެހެންވެ، އޭނާގެ ނިންމެވުންތަކަށް ބަދަލު އައުމަކީ ވެސް އެކަށީގެންވާ ކަމެކެވެ.
2010 ވަނަ އަހަރުން ފެށިގެން ސެނެޓުގައި ފްލޮރިޑާ ތަމްސީލު ކުރައްވާ ރޫބިއޯ މަޝްހޫރުވެވަޑައިގެންފައި ވަނީ ޗައިނާ، އީރާން، ވެނެޒުއެލާ އަދި ކިއުބާއާ ގުޅޭ ގޮތުން ދެކޮޅު ވެރި ސިޔާސަތުތަކެއް ގެންގުޅުއްވުމުންނެވެ.
މި ސެނެޓަރަކީ، ތާލިބާނުންގެ ކޮންޓްރޯލްގެ ދަށުގައި އޮންނަ އަފްޣާނިސްތާނާ މެދު އެމެރިކާއިން ގެންގުޅޭ ސިޔާސަތުތަކަށް ފާޑުވިދާޅުވާ ބޭފުޅެކެވެ.
އޭނާ ވަނީ އެމެރިކާއިން އަފްޣާނިސްތާނަށް ދޭ 40 މިލިއަން ޑޮލަރުގެ އެހީ ހުއްޓުވުމަށް އަމާޒުކޮށްގެން ބިލެއް ވެސް ތައާރަފް ކުރައްވާފައެވެ.
