ގަތަރުގެ އަމީރު ޝެއިހް ތަމީމް ބިން ހަމަދު އަލްޘާނީ ވަނީ ދިފާއީ ވަޒީރާއި ޗީފް އޮފް ސްޓާފާއި ޖާސޫސީ އިދާރާގެ ވެރިން ބަދަލު ކުރައްވާފައެވެ.
އައު ދިފާޢީ ވަޒީރަކީ ސުޢޫދު ބިން ޢަބްދުއްރަޙުމާން އާލަޘާނީއެވެ. އޭނާ ކުރިން ހުންނެވީ ޗީފް އޮފް ސްޓާފްގެ މަޤާމުގައެވެ. އޭގެ ކުރިން 2017 އާއި 2019 އާ ދެމެދު އޭނާ ހުންނެވީ، ޖަރުމަނާއި ޗެކް ރިޕަބްލިކްގައި ސަފީރުގެ މަގާމުގައެވެ.
އަދި ޖާސޫސީ އިދާރާގައި އިސްކޮށް ހުންނެވި، އަބްދުﷲ ބިން މުހައްމަދު ބިން މުބާރަކް އާލަޚުލައިފީ ވަނީ ޗީފް އޮސް ސްޓާފްގެ މަގާމަށް އައްޔަން ކުރައްވާފައެވެ.
އަދި ޖާސޫސީ އިދާރާގެ ވެރިއަކަށް އައްޔަން ކުރެއްވީ ޚަލްފާން ބިން އަލީ ބިން ޚަލްފާން އަލްބައްތީ އަލްކަޢުބީ އެވެ.
މިނިސްޓަރު އޮފް އެޑިއުކޭޝަން އެންޑް ހަޔަރ އެޑިއުކޭޝަން ގެ މަގާމުގައި ހުންނެވި ބުޘައިނާ ބިންތު އަލީ އަލްޖަބްރު އަލްނޫއައިމީ ވަނީ އިޖުތިމާއީ އަދި ފެމިލީ ޑިވެލޮޕްމަންޓް ވުޒާރާއަށް ބަދަލު ކުރައްވާފައެވެ. އެޑިއުކޭޝަނަށް އައްޔަން ކުރެއްވީ ލުލްވާ ބިންތު ރަޝީދު ބިން މުހައްމަދު އަލްޚާޠިރުއެވެ.
ޤަތަރުގެ އަމީރު ވަނީ އުރީދޫ ކޮމިއުނިކޭޝަންސް ގްރޫޕްގެ ޗެއާމަންގެ މަގާމުގައި ހުންނެވި، މުހައްމަދު ސައިފް ސައީދު އަލްސުވައިދީ ގަތަރު އިންވެސްޓްމަންޓް އޮތޯރިޓީގެ ސީއީއޯއަކަށް އައްޔަން ކުރައްވާފައެވެ. އޭނާ އުރީދޫގެ އިސް މަގާމުގައި ދެމިހުންނަވާނެ ކަމެއް ނުވަތަ ނޫން ކަމެއް އަދި ސާފެއް ނުވެއެވެ.
