ރ. ހުޅުދުއްފާރުގައި ޒަމާނީ ފެންވަރަށް ތަރައްގީ ކުރަމުން އަންނަ މަގުތަކުގައި ތާރު އެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ދަނީ ބާރު ސްޕީޑުގައި ކުރިއަށްގެންދަމުންނެވެ.
މިގޮތުން، އާރްޑީސީއިން މިއަދު ހުޅުދުއްފާރުގެ އަމީނީމަގުގެ ތާރު އެޅުމުގެ މަސައްކަތް ނިންމާލައިފިކަމަށް އެކުންފުނިން މަޢުލޫމާތުދެއެވެ. އަމީނީމަގުގެ އިތުރުން އާރްޑީސީއިން މިހާރު ދަނީ އެރަށު އިސްކަންދަރު މަގުގައި ތާރު އެޅުމުގެ މަސައްކަތްވެސް ކުރަމުންނެވެ.
މި މަޝްރޫއުގެ ދަށުން ހުޅުދުއްފާރުގެ ޖުމްލަ 6 މަގެއްގައި ތާރު އެޅުމަށް ވަނީ ހަމަޖެހިފައެވެ. މި މަޝްރޫއުގެ ތެރޭގައި އައު އަސްފަލްޓް މަގުތައް ހެދުމާއި، ސައިޑް ވޯކް ޑިޒައިންކޮށް އެޅުމާއި، މަގުގެ ދެފަރާތުގައި ސްޓޯމް ވޯޓަރ ޑްރެއިނެޖް ނިޒާމެއް ޤާއިމްކުރުން ހިމެނެއެވެ.
މީގެ އިތުރުން، މަގުތަކުގައި ސްޕީޑް ބްރޭކަރުތަކާއި މަގުބައްތިތައް ހަރުކުރުމާއި، މިހާރު ހުރި މަގުތަކުގައިވެސް މަގުބައްތި ޖެހުމާއި، ސްޕީޑް ބްރޭކަރު އެޅުމާއި، ކަފި ހުރަސް ކުރެހުން ހިމެނެއެވެ.
މި މަޝްރޫއަކީ 88,912,040.55 ރުފިޔާގެ މަޝްރޫއެކެވެ.
