ރަޝިޔާއިން ވަނީ އެގައުމުގައި ދަރިމައިވާ ރޭޓް ދަށް ވުމުން އެކަން ހައްލު ކުރުމަށް ޚާއްސަ މިނިސްޓްރީއެއް އުފެއްދުމަށް ނިންމާފައެވެ. އައު މިނިސްޓްރީއަކީ "މިނިސްޓްރީ އޮފް ސެކްސް" އެވެ.
ރައީސް ވްލަޑިމިއާ ޕޫޓިންގެ ގާތް އެކުވެރިއެއް ކަމަށްވާ އަދި އާއިލާ ހިމާޔަތްކުރުމާ ބެހޭ ޕާލަމެންޓްރީ ކޮމިޓީގެ މުގައްރިރު ނީނާ އޮސްޓަނީނާ ގެންދަވަނީ މިނިސްޓްރީ އޮފް ސެކްސް އުފެއްދުމަށް ހުށަހަޅާފައިވާ ހުށަހެޅުން މުރާޖައާ ކުރައްވަމުންނެވެ.
ޔޫކްރޭނުގައި ހިނގަމުންދާ ހަމަނުޖެހުމުން ރަޝިޔާގެ އާބާދީ ދަށްވެފައިވާ ދަނޑިވަޅެއްގައި ރަޝިޔާގެ އޮފިޝަލުން ދަނީ ދަރިމައިވާ ނިސްބަތް އިތުރުކުރުމަށް އާދަޔާ ހިލާފު ގޮތްތައް ހޯދުމަށް ގައުމީ ފެންވަރުގައި ވާހަކަ ދައްކަމުންނެވެ.
އެގޮތުން މިނިސްޓްރީ އޮފް ސެކްސް އުފެއްދުމާއެކު ހުށަހަޅާ ހުށަހެޅުންތަކުގެ ތެރޭގައި ދެމަފިރިންނަށް ޚާއްސަ ވަގުތުތައް ހޭދަ ކުރުމަށް ހިތްވަރު ދިނުމަށް ރޭގަނޑު 10 ން މެންދަމު 2 ށް އިންޓަނެޓު އޮފް ކޮށްލުމާއި ލައިޓް ނިއްވާލުން ހިމެނެއެވެ.
އަދި ކުދިން ބަލަން ގޭގައި މަޑުކުރާ މައިންނަށް މާލީ އިނާޔަތްތައް ދިނުމާއި ފުރަތަމަ ފަހަރަށް ޑޭޓް ކުރަން ދާމީހުންނަށާއި ކައިވެނީގެ ފުރަތަމަ ރޭތައް ހޭދަ ކުރާ މީހުންގެ ރޭތައް ސަރުކާރުން ސްޕޮންސާކޮށް މާލީ އިނާޔަތްތައް ދިނުން ހިމެނެ އެވެ.
ރިޕޯޓްތައް ބުނާ ގޮތުގައި މި އިސްނެގުމަކީ އާބާދީގެ ކާރިސާއެއް ކުރިމަތިވުމުން ސަލާމަތް ކުރުމަށް ގްލޭވްޕީއާރު އެޖެންސީގެ ހުށަހެޅުމެކެވެ.
