ސީއައިއޭގެ ޑިރެކްޓަރަކަށް ޖޯން ރެޓްކްލިފް ހޮއްވަވައިފި ކަމަށް ޑޮނަލްޑް ޓްރަމްޕް އިއުލާން ކުރައްވައިފިއެވެ.
ޓެކްސަސްގެ ކުރީގެ ކޮންގްރެސް މެމްބަރު ރެޓްކްލިފަކީ ޓްރަމްޕްގެ ފުރަތަމަ ދައުރުގައި އެމެރިކާގެ ގައުމީ ޖާސޫސީ ދާއިރާގެ ޑިރެކްޓަރެވެ.
"ޖޯން އަކީ އަޅުގަނޑުމެންގެ ގައުމުގެ އިންޓެލިޖެންސް ދާއިރާގެ އެންމެ މަތީ ދެ މަގާމުގައި ވެސް މިހާތަނަށް ފުރުއްވި ފުރަތަމަ ބޭފުޅާ،" ޓްރަމްޕް ނެރުއްވި ބަޔާނެއްގައި ވިދާޅުވި އެވެ.
2015 އިން 2020 އަށް ޓެކްސަސްގެ 4 ވަނަ ޑިސްޓްރިކްޓް ހައުސް އޮފް ރެޕްރެޒެންޓެޓިވްސްގައި ތަމްސީލު ކުރެއްވި ރެޓްކްލިފަކީ ޓްރަމްޕްގެ ފުރަތަމަ ދައުރުގައި ޑިރެކްޓަރ އޮފް ނޭޝަނަލް އިންޓެލިޖެންސްގެ މަގާމަށް އައްޔަން ކުރެވުނު ބޭފުޅެކެވެ.
ރެޓްކްލިފް އަކީ ޓެކްސަސްގައި ފެޑެރަލް ޕްރޮސެކިއުޓަރެއްގެ ގޮތުގައި މަސައްކަތް ކުރައްވާފައިވާ ބޭފުޅެއް ވެސް މެއެވެ. އޭނާގެ ވަނަވަރުގައި ވިދާޅުވަނީ "ޓެރަރިސްޓުން ޖަލަށް ލާފައިވާނެ" ކަމަށެވެ. ނަމަވެސް އެންބީސީ ނިއުސް އާއި އެހެނިހެން މީޑިއާއިން ބުނަނީ އެއީ ހޮޅިވާހަކެއް ކަމަށާއި ދުވަހަކުވެސް ޓެރަރިޒަމްގެ މައްސަލައެއްގައި އޭނާ ދައުވާއެއްކޮށްފައި ނުވާ ކަމަށެވެ.
ބެލެވޭ ގޮތުގައި އެމެރިކާގެ ޖާސޫސީ އިދާރާތައް ޓްރަމްޕްގެ ސިޔާސީ މަގްސަދުތައް ހާސިލު ކުރުމަށް ބޭނުން ކުރެއްވުމަށް މިއީ މުހިންމު ފަރާތެކެވެ.
