ނޭޝަނަލް އިންޓެގްރިޓީ ކޮމިޝަނުގައި މިހާރު ތިއްބެވި މެންބަރުންގެ ތެރެއިން މެންބަރެއްގެ މުއްދަތު ހަމަވާތީ، އެ ކޮމިޝަނަށް މެންބަރަކު ޢައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު މިއަދު ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން މިއަދު ކޮށްފައިވާ އިއުލާނެއްގައި ބުނީ މެމްބަރު ކަމަށް ކުރިމަތިލުމުގެ ސުންގަޑި ހަމަވާނީ މިމަހުގެ 20 ވަނަ ދުވަހު ކަމަށެވެ.
ނޭޝަނަލް އިންޓެގްރިޓީ ކޮމިޝަނުގެ މެމްބަރެއް ކިބައިގައި ހުންނަންވާނެ ސިފަތައް ޤާނޫނު ނަންބަރު 27/2015 (ނޭޝަނަލް އިންޓެގްރިޓީ ކޮމިޝަންގެ ޤާނޫނު) ގެ 10 ވަނަ މާއްދާގައި ވަނީ ބުނެފައެވެ. މީގެ ތެެރޭގައި 30 އަހަރު ފުރިފައިވާ މީހެއް ކަމުގައި ވާން ޖެހެއެވެ. އަދި ފުރަތަމަ ޑިގްރީ ހާސިލް ކޮށްފައިވުމާއި މަސައްކަތުގެ މައިދާނުގައި 7 އަހަރުގެ ތަޖުރިބާއެއް ހުރި މީހެއް ކަމުގައިވެސް ވާންޖެހެއެވެ.
