ކުރިއަށް އޮތް 2025 ވަނަ އަހަރުގެ ބަޖެޓުގައި، ރާއްޖޭގެ އެންމެ ފަގީރު އާބާދީގެ 20 ޕަސެންޓުގައި ހިމެނޭ ގޭބިސީތަކުގެ ތެރެއިން ކޮންމެ ގޭބިސީއަކަށް މަހަކު 2،450 ރުފިޔާ ޖަމާކޮށްދޭން ނިންމައި އެކަން ބަޖެޓުގައި ހިމަނައިފި އެވެ.
ވަރލްޑް ބޭންކުން ރާއްޖެއަށް ދެމުން އަންނަ ލަފަޔާ އެއްގޮތަށް، ސަރުކާރުން ވަނީ ސަބްސިޑީގެ ސިޔާސަތު މުރާޖާކޮށް އެންމެ ފަގީރު ގޭބިސީތަކަށް ސަބްސިޑީގެ އެންމެ ރަނގަޅު އަސަރު ކުރާނެ ގޮތަށް ރާވަމުންނެވެ.
ވަރލްޑް ބޭންކުން ދާދިފަހުން ރާއްޖޭގެ ސަބްސިޑީތަކާ ގުޅޭ ގޮތުން ނެރުނު ރިޕޯޓެއްގަިއ ބުނެފައި ވަނީ ރާއްޖޭގައި ދެމުން އަންނަ ސަބްސިޑީތަކުގެ 43 އިންސައްތަ ލިބެނީ މުއްސަނދި އާއިލާތަކަށް ކަމަށެވެ. ފަގީރުންނަށް ލިބެނީ ސަބްސިޑީގެ އެންމެ 17 އިންސައްތައެވެ.
ސަބްސިޑީއަށް އެންމެ ބޭނުންޖެހިފައިވާ މީހުންނަށް ސަބްސިޑީ ދިނުމަށްޓަކައި އަންނަ އަހަރުގެ ބަޖެޓުގައި 900 މިލިއަން ރުފިޔާ ހިމަނާފައިވެ އެވެ.
ފިނޭންސް މިނިސްޓްރީން ބުނީ އާ ނިޒާމުގެ ތެރެއިން ސަބްސިޑީއަށް އެދި ހުށަހެޅުމަށްޓަކައި ކައުންސިލްތަކާއި ގުޅިގެން ފަސޭހަ ނިޒާމެއް އެކުލަވާނެ ކަމަށެވެ. މި ބަދަލުތައް ގެނައުމަށް ހަމަޖެހިފައި ވަނީ އަންނަ އަހަރުގެ އޭޕްރީލް މަހުން ފެށިގެންނެވެ.
