ދުނިޔޭގެ ލީޑަރުންގެ ވަޢުދުތައް، ނަތީޖާ ފެންނާނޭ ފަދަ ޢަމަލުތަކަކަށް ބަދަލުކުރެއްވުމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއްޔެ ގޮވާލައްވައިފިއެވެ.
ރައީސް މުޢިއްޒު މިހެން ވިދާޅުވީ، ތަރައްޤީވަމުން އަންނަ ކުދި ޖަޒީރާ ޤައުމުތަކުގެ (ސިޑްސް) ފަރާތުން، އދ. ގެ މޫސުމީ ބަދަލުތަކާ ގުޅޭ ކޮންފަރެންސް (ކޮޕް 29) ގެ ހަވާސާގައި ބޭއްވުނު ލީޑަރުންގެ ސަމިޓުގައި އިއްވެވި ބަޔާނުގައެވެ.
ރައީސް މުޢިއްޒު އެ ބައްދަލުވުމުގައި ވިދާޅުވީ، މިހާރުގެ މާލީ ނިޒާމަކީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ބޭނުންތައް ފުއްދައިދިނުމުގައި ނާކާމިޔާބު ވެފައިވާ ނިޒާމެއް ކަމަށެވެ. އަދި މާލީ ވަސީލަތްތައް ނެތި ހިފާ އަމާޒުތަކަކީ ހަމައެކަނި އުއްމީދުތަކެއް ކަމުގައިވެސް އެމަނިކުފާނު ފާހަގަކުރެއްވިއެވެ.
ރަީސް އިތުރަށް ވިދާޅުވީ، މޫސުމީ ބަދަލުތަކުގެ ސަބަބުން، ކުޑަ ހިނދުކޮޅެއްގެ ތެރޭގައި އެތައް އަހަރެއްގެ ތަރައްޤީ ގެއްލިގެންދާކަމަށެވެ. އަދި، އަދުގެ މާލީ އޮނިގަނޑަކީ، ކުދި ޖަޒީރާ ޤައުމުތަކުގެ މުހިންމު ބޭނުންތައް ފުއްދައިދެވޭނޭގޮތަކަށް ފަރުމާކުރެވޭ އޮނިގަނޑެއްކަން ކަށަވަރުކުރުމަށް ތިން ކަމެއް ބޭނުންވާކަމަށް އެމަނިކުފާނު ވިދާޅުވިއެވެ.
އެ ތިން ކަމަކީ:
- އދ. އާއި، ބައިނަލްއަޤުވާމީ މާލީ މުވައްސަސާތަކާއި، އަމިއްލަ ސެކްޓަރުގެ ފުރިހަމަ އެހީތެރިކަން ލިބުން
- މޫސުމީ ވިލުންތެރިކަން އިތުރުކުރުމަށް ކަނޑައަޅާފައިވާ ލަނޑުދަނޑިތަކާ ގުޅޭ ދަރަނި މަޢާފުކޮށްދިނުމާއި، ކްރެޑިޓްވަރދިނަސް މާނަކުރާ ގޮތް ބަދަލުކުރުން
- މޫސުމީ ބަދަލުތަކާ ގުޅޭ މާލިއްޔަތަށް ޚާއްޞަ، އަދި ސިޑްސްގެ ޙަޤީޤީ ބޭނުންތައް ތަމްސީލުވާފަދަ، ހަރުދަނާ އަމާޒުތަކެއް ކަނޑައެޅާ، ބައިނަލްއަޤުވާމީ ކާބަން މާކެޓް މެކޭނިޒަމާ ގުޅޭ މަޝްވަރާތައް ނިމުމަކަށް ގެނައުން
ރައީސް މުޢިއްޒު އިތުރަށް ވިދާޅުވީ، ރާއްޖެއިން މިހާރުވެސް މޫސުމީ ބަދަލުތަކާ ކުރިމަތިލުމަށް ގިނަ ފިޔަވަޅުތަކެއް އަޅަމުންދާ ކަމަށެވެ. މީގެ ތެރޭގައި އިޤްތިޞާދީ އަދި ޙަޟާރީ ތަރައްޤީ އާއި ހަކަތަ އުފެއްދުންފަދަ ދާއިރާތަކުގައި އަޅާފައިވާ ފިޔަވަޅުތައް ހިމެނެއެވެ.
މީގެ އިތުރުން، ތަރައްޤީވަމުން އަންނަ ކުދި ޖަޒީރާ ޤައުމުތަކުން މޫސުމީ ކަންކަމުގައި ފިޔަވަޅުތައް އެޅުމަށް އެދި އަޑުއުފުލާތާ އެތައް އަހަރެއް ވެއްޖެކަމަށް ރައީސް މުޢިއްޒު ވިދާޅުވިއެވެ. އަދި ވަޢުދުތައް ޢަމަލީގޮތުން ދެއްކުމަށް ރައީސް ގޮވާލެއްވެވިއެވެ.
ކޮޕް 29 ގެ މައިގަނޑު މަޤްޞަދަކީ މޫސުމީ ބަދަލުތަކާ ގުޅޭގޮތުން ބައިނަލްއަޤްވާމީ މުޖުތަމަޢުގެ މެދުގައި އެއްބަސްވުމަކަށް އާދެވޭތޯ މަސައްކަތްކުރުމެވެ. މި ކޮންފަރެންސް ކުރިއަށްދާނީ 22 ނޮވެމްބަރު އާ ހަމައަށެވެ.
