އިންޑިއާގެ ވެރިކަން ކުރާ ޕާޓީން ހިންގާ، "ދަތްގަނޑު ޖަހައި ގެތައް ތަޅާލާ އިންސާފަކީ" ބަލައި ގަނެވޭނެ އަމަލެއް ނޫން ކަމަށް އިންޑިއާގެ ސްޕްރީމް ކޯޓުން ބުނެފިއެވެ. އުއްތްރަ ޕްރަދޭޝްގައި ވެރިކަން ކުރާ ބީޖޭޕީއަކީ ސަރުކާރާ ޚިޔާލުތަފާތުވާ މީހުންގެ ގެތައް ބުލްޑޯޑަރު ބޭނުންކޮށްގެން ތަޅާލާ ސަރުކާރެކެވެ.
ސުޕްރީމް ކޯޓުން ބުދަ ދުވަހު ކުރި ޙުކުމް ގައި ބުނީ ކުރިން ވެރިފަރާތަށް ސަބަބު ދެއްކުމެއް ނެތި، އަދި ނޯޓިސްއެއް ދިނުމެއް ނެތި، މީހެއްގެ ގެއެއް ތަޅާލުމަކީ ކުރެވޭނެ ކަމެއް ނޫން ކަމަށެވެ.
ސުޕްރީމް ކޯޓުގެ ބެންޗުން ވަނީ ބީޖޭޕީގެ ސަރުކާރަށް ފާޑު ކިޔަމުން ސަރުކާރުގެ ބިންތަކުގައި ގަވާއިދާ ޚިލާފަށް އަޅާ ގެތައް ތަޅާލުމާ ބެހޭ ސާފު ގައިޑްލައިނެއް އެކުލަވާލާފައެވެ. މިގައިޑްލައިންއަކީ ސުޕްރީމް ކޯޓުން ބުނީ 'ބުލްޑޯޒަރ އެކްޝަން' އާއި ދެކޮޅަށް އެކުލަވާލާ ގައިޑްލައިންތަކެއް ކަމަށެވެ.
އަދި އެ ގައިޑްލައިންއާ ސްޓޭޓްގެ ސަރުކާރުން ޚިލާފް ވެއްޖެނަމަ ކޯޓުގެ ހުރުމަތް ކަނޑާލުމުގެ ދައުވާގެ އިތުރުން ޖިނާއީ ޝަރީއަތެއްވެސް ހިންގޭނެ ކަމަށް ބުނެފައި ވެއެވެ.
އޭގެ އިތުރުން ދަތްގަނޑު ޖަހައި މީހެއްގެ އިމާރާތެއް ތަޅާލުމަކީ ސުޕްރީމް ކޯޓުގެ އަމުރާ ޚިލާފު ކަމެއް ކަމަށް ސާބިތު ވެއްޖެނަމަ އެކަމަށް ޒިންމާވާ މީހަކު ގެއްލުމުގެ ބަދަލު ދިނުމުގެ އިތުރުން ހަލާކުވި މުދާ އެމީހަކު އަމިއްލައަށް ދޭން ޖެހޭ ގޮތަށް ޒިންމާ ކުރުވާނެ ކަމުގައިވެސް ބުނެފައި ވެއެވެ.
