މައިންގެ އުރަމަތީ ކިރު، ފުޅީގައި ބަންދުކޮށްގެން އިންޑިއާގެ ބެންގަލޫރު ސިޓީގައި ވިއްކަމުންދާ މއްސަލާގައި މުނޭގޯޑާ ނަމަކަށް ކިޔާ މީހަކު ހުށަހެޅި ދައުވާއެއް ހައިކޯޓުން ބަލަމުން ދަނިކޮށް، މިނި ކިރު ފުޅީގައި ބަންދުކޮށްގެން ނުވިއްކޭނެ ކަމަށް އިންޑިއާ ސަރުކާރުން ސްޓޭޓް ސަރުކާރަށް އަންގައިފިއެވެ.
ހައިކޯޓުގައި ބަލަމުން ދިޔަ ދައުޥާއަކީ، އުރަމަތީގެ ކިރު އެއްކޮށްގެން ފުޅީގައި ބަންދުކޮށްގެން ބެންގަލޫރުގައި ބައިނަލްއަގްވާމީ ކުންފުނިތަކުން ކުރަމުން ދިޔަ ވިޔަފާރިއާ ދެކޮޅަށް ކޮށްފައިވާ ދައުވާއެކެވެ.
މުނޭގޯޑާ ހުށަހެޅި ދައުވާއަކީ އާންމު ފައިދާއަށް ހުށަހެޅި ޕަބްލިކް އިންޓަރެސްޓް ލިޓިގޭޝަންގެ ދައުވާއެކެވެ.
ދައުވާއަށް ޖަވާބުދާރީ ވެވަޑައިގަންނަވަމުން، އެޑިޝަނަލް ސޮލިސިޓަރ ޖެނެރަލް އޮފް އިންޑިއާގެ ވަކީލު، ކޯޓުގައި ވިދާޅުވީ މިނި ކިރު ފުޅީގައި ބަންދުކޮށްގެން ވިއްކުން އިންޑިއާ ސަރުކާރުން މިހާރު މަނާކޮށްފައި ވާނެ ކަމަށެވެ. އަދި އެ، އިރުޝާދުތަކަށް ތަބާވެ، އަމިއްލަ ފަރާތްތަކަށް ދޫކޮށްފައިވާ ލައިސަންސްތައް ސްޓޭޓް ސަރުކާރުން ބާޠިލު ކޮށްފައިވާ ކަމަށް އޭނާ ވިދާޅުވިއެވެ.
ބެންގަލޫރުގައި އަޔުރްވެޑިކް ބޭސްގެ ގޮތުގައި ހޯދާފައިވާ ހުއްދައެއްގެ ދަށުން، މިނި ކިރު، 50 އެމްއެލް ފުޅީގައި ބަންދުކޮށް ފިނިކޮށް ވިއްކަމުން ގެންދިޔައެވެ. އަދި 10 ގްރާމްގެ ފެކެޓްގައި ޕައުޑަރު ކިރުގެ ގޮތުގައިވެސް ވިއްކިއެވެ.
50 އެމްއެލް ފުޅިއެއްގެ އަގަކީ، 1،239 ރުޕީސްއެވެ. އަދި ޕައުޑަރު ޕެކެޓެއް 313 ރުޕީސްއަށެވެ.
ހައި ކޯޓުގެ 3 ފަނޑިޔާރުންގެ ބެންޗުން ބުނީ މައްސަލައިގައި ޙުކުމް ކުރާނީ 4 ޑިސެމްބަރުގައި ކަމަށެވެ.
