ހަސަން މަމްދޫހު (މަންޑޭ) ކޭޕާކްގެ ފްލެޓްތައް މަކަރާއި ހީލަތުން ވިއްކައިގެން ހޯދާފައިވާ ކަމަށް ބެލެވޭ މުދާތަކާއި ޕެންޓްހައުސް ޝަރީއަތް ނިމެންދެން ހިފަހައްޓަން ކްރިމިނަލް ކޯޓުން މިއަދު އަމުރުކޮށްފި އެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ދައުލަތުން ވަނީ މަންޑޭގެ މައްޗަށް ކުރިން ނެރުނު އަމުރުގެ މުއްދަތު ހަމަވާތީ، މުއްދަތު އިތުރުކޮށް ޝަރީއަތް ނިމެންދެން މުދާތައް ހިފެހެއްޓުމަށް އެދިފަ އެވެ. ކޯޓުން ނިންމެވީ ދައުލަތުން އެދުނު ގޮތަށް، ޝަރީއަތް ނިމެންދެން މަންޑޭގެ މުދާތައް ހިފެހެއްޓުމަށެވެ.
ކޯޓު އަމުރުގެ ދަށުން ހިފެހެއްޓި ތަކެތީގެ ތެރޭގައި މަންޑޭ އާއި އޭނާގެ އަނބިމީހާ ދިރިއުޅެމުންދާ 8 މިލިއަން ރުފިޔާގެ އަގުހުރި ޕެންޓްހައުސް ވެސް ހިމެނެ އެވެ.
މަންޑޭއަކީ ކޭޕާކް އިމާެރާތް ކުރި ހަންބޯ މޯލްޑިވްސް ކުންފުނީގެ ކުރީގެ އެއްހިއްސާދާރެވެ.
