އއ. މަތިވެރީގައި ލޯބިވެރިޔާއަށް ބިރުދެއްކިކަމުގެ ތުހުމަތުގައި 19 އަހަރުގެ ފިރިހެނަކު ހައްޔަރުކޮށްފި ކަމަށް ފުލުހުން ބުނެފިއެވެ.
ފުލުހުން މިހެން ބުނީ މިޑީއާތަކަށް މިއަދު ފޮނުވި މެސެޖެއްގައެވެ.
މި މެސެޖުގައި ފުލުހުން އިތުރަށް ބުނެފައިވަނީ މި މައްސަލައެއްގައި ހައްޔަރުކޮށްފައިވަނީ މަތިވެރި ޕޮލިސްޓޭޝަންއިގައި މަސައްކަތްކުރާ އެ ރަށު ފަޒާ، ޒައިދާން މުހައްމަދު (19) ކަމަށެވެ.
ފުލުހުން ބުނީ އޭނާގެ ލޯބިވެރިޔާއަށް ބިރު ދައްކާ އޭނާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކުކޮށްލާނެ ކަމަށް ބުނެ ބިރުދައްކާ އިންޒާދު ދީ ބްލެކްމެއިލް ކުރި ކަމަށް ތުހުމަތުކުރެވޭ މައްސަލަ އާއި ގުޅިގެން މި މަހުގެ 13 ވަނަ ދުވަހު ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.
އެ މައްސަލައާ ގުޅިގެން އޭނާގެ ބަންދާ މެދު ގޮތެއް ނިންމަން މަތިވެރި މެޖިސްޓްރޭޓް ކޯޓަށް ހާޒިރުކުރުމުން 3 ދުވަހަށް ބަންދުކުރަން އަމުރުކޮށްފައިވާ ކަމަށްވެސް ފުލުހުން ބުނެފައިވެއެވެ.
އިތުރަށް ފުލުހުން ބުނީ މި މައްސަލަ ތަހުގީގުކުރަމުން އަންނަކަމަށެވެ.
