ތަޢުލީމީ ވުޒާރާއިން މިއަދު ހާމަކުރި ގޮތުގައި، އޭޝިއާ-ޕެސިފިކް ސަރަހައްދުގެ ތަޢުލީމީ ރޭވުންތެރިކަމާ ގުޅޭ މުހިންމު ކޮންފަރެންސެއްގައި ދިވެހިރާއްޖެއިން ބައިވެރިވެއްޖެއެވެ.
"ރީޖަނަލް ކޮންފަރެންސް އޮން އެޑިޔުކޭޝަން ޕްލޭނިންގ އިން އޭޝިއާ-ޕެސިފިކް 2024" ގެ ނަމުގައި ބޭއްވުނު މި ކޮންފަރެންސްގައި ދިވެހިރާއްޖެ ތަމްސީލުކުރެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަޙުމަދު މުޙައްމަދެވެ. ޔުނެސްކޯ އިންޓަނޭޝަނަލް އިންސްޓިޓިއުޓް ފޯ އެޑިއުކޭޝަނަލް ޕްލޭނިން (އައި.އައި.އީ.ޕީ) އިން އިންތިޒާމުކޮށްގެން ބޭއްވި މި ކޮންފަރެންސްގެ މައިގަނޑު މަޤްޞަދަކީ އޭޝިއާ-ޕެސިފިކް ސަރަހައްދުގައި ތަޢުލީމީ ދާއިރާގެ ރޭވުންތެރިކަމާއި ހިންގުންތެރިކަން އިތުރުކުރުމަށްޓަކައި އެންމެން ގުޅިގެން މަސައްކަތްކުރުމުގެ އެޖެންޑާއެއް އެކުލަވާލުމެވެ.
ފިލިޕީންސްގެ ވެރިރަށް މެނީލާގައި މި މަހުގެ 5 އިން 7 އަށް ކުރިއަށް ދިޔަ މި ކޮންފަރެންސްގައި އަލިއަޅުވާލެވުނު މުހިންމު ދާއިރާތަކުގެ ތެރޭގައި ދިރާސާކުރުމާއި، ފަންނީ އެހީތެރިކަމާއި، އަދި ތަމްރީން ޕްރޮގްރާމްތައް މެދުވެރިކޮށް ތަޢުލީމީ ރޭވުންތެރިކަން ހަރުދަނާކުރުން ހިމެނެއެވެ.
މި ކޮންފަރެންސްގައި ބައިވެރިވުމުން، ސަރަހައްދުގެ އެހެން ޤައުމުތަކާ އެކު ތަޢުލީމީ ދާއިރާގެ ތަޖުރިބާ ހިއްސާކުރުމުގެ ފުރުޞަތު ދިވެހިރާއްޖެއަށް ލިބިގެންދިޔައެވެ. މީގެ އިތުރުން، ތަޢުލީމީ ރޭވުންތެރިކަމުގެ ދާއިރާގައި ކުރިއަރާފައިވާ ޤައުމުތަކުގެ އާ ޚިޔާލުތަކާއި ވިސްނުންތައް ދެނެގަތުމުގެ ފުރުޞަތުވެސް ލިބިގެންދިޔައެވެ.
