އދގެ ޚާއްސަ ކޮމިޓީއަކުން، ބުރާސްފަތި ދުވަހު އާންމުކުރި ރިޕޯޓެއްގައިވާ ގޮތުން ޣައްޒާގައި އިޒްރޭލުން ދަނީ ބަނޑުހައިހޫނުކަން ހަނގުރާމައިގެ ހަތިޔާރެއްގެ ގޮތުގައި ބޭނުންކުރަމުންނެވެ.
މި ރިޕޯޓުގައި 2023 ވަނަ އަހަރުގެ އޮކްޓޯބަރު މަހުން ފެށިގެން 2024 ވަނަ އަހަރުގެ ޖުލައި މަހުގެ ނިޔަލަށް އިޒްރޭލުން ހިންގާފައިވާ ޖަރީމާތައް ކަވަރުކޮށްފައިވެއެވެ. އިޒްރޭލުން ދީފައިވާ ގެއްލުންތައްވެސް ޑޮކއުމެންޓް ކޮށްފައި ވެއެވެ.
އެގޮތުން ފެނާއި ނަރުދަމާއާއި ކާބޯތަކެތީގެ ވަސީލަތްތަކާއި ނިޒާމުތައް ހިމެނޭ މުހިންމު އިންފްރާސްޓްރަކްޗަރތައް ހަލާކު ކުރުމުން އިންސާނީ ކާރިސާއެއް އުފެދި، އާންމުންގެ ތަކުލީފު އިތުރަށް ބޮޑުވެފައިވާކަން ފާހަގަކޮށްފައިވެއެވެ.
އަދި އިޒްރޭލުން އޭއައި (މަބް) ބޭނުންކޮށްގެން މީހުންނަށް އަމާޒުކުރުމުން އަންހެނުންނާއި ކުޑަކުދިން ގިނަ އަދަދަކަށް މަރާލާފައިވާ ކަމަށް ބުނެ ކޮމިޓީން ވަނީ ފާޑުކިޔާފަ އެވެ.
މީގެ އިތުރުން މީޑިއާ ސެންސަރުކުރުމާއި، އިންސާނީ އެހީތަކަށް ހުރަސްއެޅުމުގެ އަމަލުތައްވެސް އިޒްރޭލުން ހިންގާފައިވާ ކަމަށް ބުނެފައި ވއެވެ.
ބައިނަލްއަޤްވާމީ ޤާނޫނީ ނިޒާމު އިތުރަށް ހަލަބޮލިވެގެން ދިޔަ ނުދިނުމަށްޓަކައި އިޒްރޭލު ޖަވާބުދާރީ ކުރުވުމަށް އދ.ގެ މެމްބަރު ޤައުމުތަކަށް ކޮމިޓީން ވަނީ އިލްތިމާސްކޮށްފައެވެ.
މި ހޯދުންތައް އަންނަ ހޯމަ ދުވަހު އދ.ގެ އާންމު މަޖިލީހަށް ހުށަހަޅާނެއެވެ.
