ފައިބަރ އޮޕްޓިކް ކޭބަލްތަކަކީ "މުހިންމު އިންފްރާސްޓްރަކްޗަރ" ގެ ގޮތުގައި ކަނޑައަޅާ، އެ ކޭބަލްތައް ރައްކާތެރިކުރުމަށް ގޫގުލްއިން އެފްރިކާގެ ސަރުކާރުތަކަށް ގޮވާލައިފިއެވެ.
މިކަމުގެ ސަބަބުން ވެންޑަލިޒަމްއާ ދެކޮޅަށް ރައްކާތެރިކަން އިތުރުވެ، ޑިޖިޓަލް ގުޅުން ހަރުދަނާވާނެ ކަމަށް ގޫގުލްއިން ބުނެފައިވެއެވެ.
އެފްރިކާގައި ގޫގުލްގެ ސަރުކާރާ ގުޅުންހުރި ކަންކަމާއި ޕަބްލިކް ޕޮލިސީގެ ވެރިޔާ ޗާލްސް މުރިޓޯ ވިދާޅުވި ގޮތުގައި، އެއްގަމުގައާއި ކަނޑުއަޑީގައި އަޅާފައިވާ ކޭބަލްތައް ރައްކާތެރިކުރުމަކީ އެ ބައްރުގައި ހަރުދަނާ މުވާސަލާތީ ވިއުގައެއް ޤާއިމުކުރުމަށް ކޮންމެހެން ބޭނުން ކަމެކެވެ.
މިހާރަކަށްއައިސް ކުށްކުރާ ގްރޫޕުތަކުން ބެޓެރީއާއި ޖަނަރޭޓަރު ފަދަ ތަކެތި ހޯދުމަށް ނެޓްވޯކް އިންފްރާސްޓްރަކްޗަރ އަމާޒުކުރަމުންދާކަން ފާހަގަކުރެވެއެވެ. މިކަމުގެ ސަބަބުން ޓެލެކޮމް ޚިދުމަތްދޭ ފަރާތްތަކަށް އިތުރު މާލީ ބުރަ އުފުލަން ޖެހެއެވެ.
އެފްރިކާ ޓެކް ކޮންފަރެންސްގައި ވާހަކަދައްކަވަމުން މުރިޓޯ ވިދާޅުވީ، މުހިންމު އިންފްރާސްޓްރަކްޗަރގެ ދަރަޖަ ދިނުމުން ގެއްލުން ދިނުމުގެ އަދަބު ހަރުކަށިވެ، ވައްކަމާއި ވެންޑަލިޒަމް ހުއްޓުވުމަށް މަގުފަހިވާނެ ކަމަށެވެ. ގޫގުލްއިން ވަނީ އެފްރިކާއާއި ޔޫރަޕް ގުޅުވައިދޭ "އިކުއިއާނޯ" ފަދަ މުހިންމު ކަނޑުއަޑީ ކޭބަލްތަކުގައި އިންވެސްޓްކޮށްފައެވެ. އަދި ފަހުން އެފްރިކާއާއި އޮސްޓްރޭލިއާ ސީދާ ގުޅުވައިދޭ "އުމޯޖާ" މަޝްރޫޢު ފަށާނެކަން އިޢުލާންކޮށްފައިވެއެވެ.
މީގެ އިތުރުން، އެފްރިކާގެ ޤައުމުތަކުގައި ފައިބަރާ ގުޅޭ ސިޔާސަތުތައް އެއްގޮތްކުރުމަށްވެސް މުރިޓޯ ގޮވާލެއްވިއެވެ. މިކަމުން ޚަރަދު ކުޑަވެ، އިންޓަރނެޓަށް އެކްސެސްކުރަން ފަސޭހަވާނެ ކަމަށް އޭނާ ވިދާޅުވިއެވެ. މިދިޔަ އަހަރު މޮބައިލް އިންޓަރނެޓް ބޭނުންކުރާ މީހުންގެ ނިސްބަތް 27 އިންސައްތައިގައި ހުރިއިރު، ކޭބަލް އެޅުމާއި މަރާމާތުކުރުމާ ގުޅޭ ޤަވާޢިދުތައް އެއްގޮތް ނުވުމަކީ އިންޓަރނެޓް ފުޅާކުރުމަށް ހުރި ހުރަހެކެވެ. މިކަމާ ގުޅިގެން ދެކުނު އެފްރިކާގެ އިސްވެރިން ވަނީ ޤާނޫނު ތަންފީޒުކުރުން ހަރުދަނާކުރުމަށް ގޮވާލާފައެވެ. ނަމަވެސް، ފައިބަރ އޮޕްޓިކް ކޭބަލްތަކަށް އަދިވެސް ރަސްމީކޮށް މުހިންމު އިންފްރާސްޓްރަކްޗަރގެ ދަރަޖަ ދީފައެއް ނުވެއެވެ.
