ވަރލްޑް ކަޕް ކޮލިފައިން ދެކުނު އެމެރިކާ ޒޯނުގައި، ޕެރަގުއޭ އަތުން 1-0 އިން ދުނިޔޭގެ ޗެމްޕިއަން އާޖެންޓީނާ ބަލިވިއިރު، މަޝްހޫރު ބްރެޒިލް އާއި ވެނަޒުއެލާ ބައްދަލު ކުރި އެއްވަރުވެއްޖެއެވެ.
ރާއްޖޭ ގަޑިން ރޭ ފަތިހު އާޖެންޓީނާ އާއި ޕެރަގުއޭ ބައްދަލު ކުރި މެޗުގައި ފުރަތަމަ ލީޑް ނެގީ އާޖެންޓީނާއެވެ. މި ލަނޑު 11 ވަނަ މިނެޓުގައި ކާމިޔާބު ކޮށްދިނީ ފޯވާޑް ލައުޓާރޯ މާޓިނޭޒެވެ. ޕެރަގުއޭއިން އެއްވަރު ކުރީ 19 ވަނަ މިނެޓުގައި އެންޓޯނިއޯ ސަނަބްރިއާ ކާމިޔާބު ކޮށްދިން ލަނޑަކުންނެވެ. މިއީ ބައިސިކަލް ކިކަކުން ޖެހި ހިތްގައިމު ލަނޑެކެވެ. ޕެރަގުއޭ ލީޑް ނެގީ ދެވަނަ ހާފް ފެށިތަނާހެން އޮމަރު އަލްޑިރެޓް ކާމިޔާބު ކުރި ލަނޑުންނެވެ. މިލަނޑު އޮމަރު ޖެހީ، މެސީއާއެކު އިންޓަޔާމީއަށް ކުޅެމުން އަންނަ ޑިއޭގޯ ގޮމޭޒް ތަނަވަސްކޮށްދިން ފުރުސަތަކުންނެވެ.
ޕެރަގުއޭގައި ކުޅުނު މިމެޗަށް އާޖެންޓީނާ ރަމްޒުކޮށްދޭ އެއްވެސް ޖާޒީއެއް ނުވެއްދޭނެކަން ޕެރަގުއޭ ފުޓްބޯޅަ ފެޑެރޭޝަނުން މެޗުގެ ކުރިން ސަޕޯޓަރުންނަށް އެންގިއެވެ. އޭގެ ބަދަލުގައި ސަޕޯޓަރުންވެސް ޕެރަގުއޭ ގައުމީ ޓީމު ރަމްޒުކޮށްދޭ ޖާޒީ ލުމަށް އެގައުމުގެ ފުޓްބޯޅަ ފެޑެރޭޝަނުން އޮތީ ސަޕޯޓަރުން ކިބައިން އެދިފައެވެ.
މުޅި މެޗް އާޖެންޓީނާއިން ކޮންޓްރޯލް ކޮށްގެން ކުޅުނުއިރު، ޕެރަގުއޭއިން ވަނީ 17 ފައުލް ކޮށްފައެވެ. މީގެ ތެރެއިން ގިނަ ފައުލްތައް ކޮށްފައި ވަނީ ކެޕްޓަން ލިއޮނަލް މެސީ ހުއްޓުވުމަށެވެ. ފައުލްތައް ރެފްރީ ކާޑް ނުދެއްކުމުގެ ސަބަބުން މެސީ އާއި އާޖެންޓީނާ އެހެން ކުޅުންތެރިން ވަނީ ރެފްރީއަށް ވަރަށް ބޮޑަށް ނުރުހުން ފާޅުކޮށްފައެވެ. ރެފްރީއަކަށް އާޖެންޓީނާއާ ވާދަވެރި ބްރެޒިލްގެ އެންޑަސަން ޑަރޮންކޯއެވެ.
އެންމެ ފާހަގަ ކޮށްލެވެނީ، ޕެރަގުއޭއިން އާޖެންޓީނާ މައްޗަށް ކުރި މި ހޯދީ އާޖެންޓީނާގެ ކޯޗެއްގެ އިރުޝާދުގެ ދަށުން ކުޅެގެން ކަމެވެ. ޕެރަގުއޭގެ ކޯޗަކީ އާޖެންޓީނާގެ ތަޖުރިބާކާރު ކޯޗެއް ކަމުގައިވާ ގުސްޓާވޯ އަލްފަރޯއެވެ. އޭނާގެ އިރުޝާދުގެ ދަށުން ޕެރަގުއޭއިން 5 މެޗް ކުޅެފައިވާއިރު އެއްވެސް މެޗަކުން ބަލިވެފައެއް ނުވެއެވެ. ގުސްޓާވޯގެ އިރުޝާދުގެ ދަށުން މިދިޔަ މަހު ޕެރަގުއޭއިން ބްރެޒިލް ވެސް ބަލިކުރިއެވެ.
މަޑުމަޑުން ފޯމަކަށް އެޅެމުން އަންނަ ބްރެޒިލް ރަށުން ބޭރުގައި ވެނަޒުއެލާއާ އެއްވަރުވީ 1-1 އިންއެވެ. ބްރެޒިލުން 43 ވަނަ މިނެޓުގައި ލީޑް ނެގީ ބާސެލޯނާގައި މިސީޒަނުގައި ތަފާތު މޮޅު ކުޅުމެއް ދައްކަމުން އަންނަ ރަފީނާއެވެ. ވެނަޒުއެލާއިން އެއްވަރު ކުރީ ދެވަނަ ހާފުގެ ފުރަތަމަ މިނެޓުގައެވެ. ބްރެޒިލަށް ،ލީޑް ނަގަން ލިބުނު ޕެނަލްޓީ ބޭނުން ހިފޭ ގޮތެއް ނުވިއެވެ.
10 ގައުމު ހިމެނޭ ދެކުނު އެމެރިކާ ޒޯނުގެ އެއްވަނައިގައި އާޖެންޓީނާ އޮތީ 11 މެޗުން ހޯދި 22 ޕޮއިންޓާއެކުއެވެ. ބްރެޒިލް 3 ވަނައިގައި އޮތީ 17 ޕޮއިންޓާއެކުއެވެ. މިރޭ ފަތިހު އުރުގުއޭ އާއި ކޮލަމްބިއާ ބައްދަލު ކުރާ މެޗުން ކޮލަމްބިއާ މޮޅުވެއްޖެނަމަ، ޕޮއިންޓުގެ ގޮތުން ކޮލަމްބިޔާއާ އާޖެންޓީނާ އެއްވަރުވާނެއެވެ. އަނެއްކޮޅުން އުރުގުއޭ މޮޅުވެއްޖެނަމަ، ކޮލަމްބިޔާއާ ޕޮއިންޓުގެ ގޮތުން އެއްވަރު ކުރެވޭނެއެވެ. އުރުގުއޭ 4 ވަނައިގައި އޮތީ 16 ޕޮއިންޓާއެކުއެވެ.
