ޔުއެފާ ނޭޝަންސް ލީގުގައި ރޭ ވަރުގަދަ ސްޕެއިނާއި ޕޯޗުގަލް މޮޅުވެ ކުއާޓާފައިނަލުގެ ޖާގަ ކަށަވަރު ކޮށްފިއެވެ.
އެންމެފަހުގެ ޔޫރޯގެ ޗެމްޕިއަންކަން ހޯދި ސްޕެއިން މޮޅުވީ ރަށުން ބޭރުގައި ޑެންމާކާ ވާދަކޮށް 2-1 އިންނެވެ. ސްޕެއިނަށް ލަނޑު ޖަހައިދިނީ މިކޭލް އޮޔަޒަބަލް އާއި ވިޔަރެއާލްގެ ތަޖުރިބާކާރު އެޓޭކިންގ މިޑްފީލްޑަރު އަޔޯޒީ ޕެރޭޒްއެވެ. ކޯޗް ޑިލަ ފުއެންޓޭ މިމެޗުގެ ފުރަތަމަ އެގާރާގައި ޕެރޭޒް ހިމަނައި އޭނާ ލައްވައި ކުޅުވީ ސެންޓަރ ފޯވާޑަކަށެވެ. ޑެންމާކަށް ސުން ކަނޑުވާލަ ދިނީ މެޗް ނިމެން 6 މިނެޓަށް ވެފައި ވަނިކޮށް ގުސްޓާވް އިސާކްސެންއެވެ.
އަނިޔާގެ ސަބަބުން މިމެޗުގައި ސްޕެއިނުގެ ޒުވާން ތަރި ލަމީން ޔަމާލް ނުކުޅެއެވެ. އަދި ޒުވާން ކުޅުންތެރިން ކަމުގައިވާ ޕެޑްރީ، ކަސާޑޯ އަދި ނިކޯ ވިލިއަމްސް ކުޅެން އެރުވީ ބެންޗުންނެވެ.
ކްރިސްޓިއާނޯ ރޮނާލްޑޯގެ ޕޯޗުގަލް އަމިއްލަ ދަނޑުގައި ޕޮލެންޑް އަތުން މޮޅުވީ 5-1 ގެ ބޮޑު ތަފާތަކުންނެވެ. މީގެ ތެރެއިން 2 ލަނޑު ކާމިޔާބުކޮށްދިނީ ރޮނާލްޑޯއެވެ. މީގެ ތެރެއިން ފުރަތަމަ ލަނޑު ކާމިޔާބު ކުރީ ޕެނަލްޓީއަކުންނެވެ. ދެވަނަ ލަނޑަކީ ބައިސިކަލް ކިކަކުން ޖެހި ހިތްގައިމު ލަނޑެކެވެ. ޕޯޗުގަލްއަށް ދެން ލަނޑު ޖަހައިދިނީ ބްރޫނޯ ފެނާންޑޭޒް، ރަފޭލް ލިއާއޯ އަދި ޕެޑްރޯ ނެޓޯއެވެ. ޕޮލެންޑުގެ ހަމައެކަނި ލަނޑު ކާމިޔާބު ކޮށްދިނީ ޑޮމިނިކް މާކް ޒުކްއެވެ.
މިމެޗުގައި ފެނިގެންދިޔަ 6 ލަނޑުވެސް ކާމިޔާބު ކޮށްފައި ވަނީ މެޗުގެ އެންމެފަހު 30 މިނެޓުގައިކަން ފާހަގަ ކޮށްލެވެއެވެ.
މެޗުގެ އުސްއަލިތައް:
https://www.youtube.com/watch?v=01VJi_x44Ms
ނޭޝަންސް ލީގުގައި ޕޯޗުގަލް އޮތީ، އެ ގައުމު ހިމެނޭ ލީގް އޭގެ ގްރޫޕް 1 ގެ އެއްވަނައިގައެވެ. އެއީ 13 ޕޮއިންޓާއެކުއެވެ. މި ގްރޫޕުގެ ދެވަނައިގެ އޮތް ކްރޭޝިޔާ ރޭ ވަނީ ސްކޮޓްލޭންޑް އަތުން 1-0 އިން ބަލިވެފައެވެ. ސްޕެއިން ހިމެނެނީ ލީގް އޭގެ ގްރޫޕް 4 ގައެވެ. ސްޕެއިން މި ގްރޫޕުގެ 1 ވަނައިގައި އޮތްއިރު، ދެވަނައިގައި އޮތީ ޑެންމާކެވެ.
