ފްރާންސްގެ މަޝްހޫރު ކްލަބެއް ކަމުގައިވާ ލިޔޮން, ކްލަބުގެ ދަރަނިތައް އަދާ ނުކޮށްފިނަމަ ދެން އަންނަ ސީޒަނަށް ދެވަނަ ޑިވިޝަނަށް ރެލިގޭޓު ކުރުމަށް ފްރާންސްގެ ފުޓުބޯޅަ އިދާރާ ކަމުގައިވާ ޑީއެންސީޖީއިން ނިންމައިފިއެވެ.

ލިޔޮންގެ 77 އިންސައްތައިގެ ސްޓޭކެއް އޮންނަ 'އީގަލް ފުޓްބޯލް ގްރޫޕު' ގެ މާލީ ރިޕޯޓުތައް ހާމަކުރާ ގޮތުގައި އެ އޯގަނައިޒޭޝަނުން އޮތީ 500 މިލިއަން ޑޮލަރާ ގާތްކުރާ އަދަދަކަށް ދަރާފައެވެ.

އީގަލް ފުޓްބޯލް ގްރޫޕުގެ ވެރިޔާ ކަމުގައިވާ ޖޯން ޓެކްސްޓާ ވަނީ, ޑީއެންސީޖީއިން ލިޔޮންގެ ދަރަނިތައް އަދާ ކުރުމަށް ދެން އަންނަ އަހަރުގެ މެއި މަހާ ހަމައަށް ދިން މުހުލަތުގެ ކުރިން އެ ކްލަބުގެ މާލީ ހާލަތު ރަނގަޅު ކުރާނެ ކަމުގެ ޔަގީންކަން ސްޕޯޓަރުންނަށް ދީފައެވެ.

ލިޔޮންގެ މާލީ ހާލަތު ރަނގަޅު ކުރުމަށް އެ ކްލަބުގެ ބައެއް ކުޅުންތެރިން ވިއްކާލަން ޖެހޭ އިރު, ޓެކްސްޓާ ވަނީ ކްލަބުގެ އެންމެ މޮޅު ކުޅުންތެރިން ނުވިއްކާނެ ކަމަށް ބުނެފައެވެ.

ފްރާންސްގެ ވަރަށް ގިނަ ކްލަބުތަކުން ފަހަކަށް އައިސް އަންނަނީ މާލީ މައްސަލަތަކާ ކުރިމަތިލަމުންނެވެ. އެ ގޮތުން ދާދި ފަހުން ޑީއެންސީޖީއިން ވަނީ ބޯޑޭއޫ (ފްރާންސްގެ ތާރީހީ ކްލަބެއް) ދެ ޑިވިޝަން ތިރިއަށް ރެލިގޭޓު ކޮށް, ކްލަބުގެ ޕްރޮފެޝަނަލް ސްޓޭޓަސް އަތުލައިފައެވެ.

ބޯޑޭއޫއަށް ކުރިމަތިވި ކަހަލަ ކަމެއް ލިޔޮންއަށް ވިޔަނުދިނުމަށް ޓަކައި ޓެކްސްޓާ އަންނަނީ އޭނާގެ އޯގަނައިޒޭޝަނުން ހިންގަމުންދާ އެހެން ބައެއް ކްލަބުތައް ވިއްކާލުމުގެ މަސައްކަތް ކުރަމުންނެވެ. ލިޔޮންގެ މާލީ ހާލަތާ ބެހޭ ގޮތުން މައުލޫމާތު ދިނުމަށް މިއަދު ޕްރެސް ކޮންފެރެންސްއެއް އޭނާ ވަނީ އިންތިޒާމު ކޮށްފައެވެ.