ޔުވެންޓަސްއިން ފްރާންސްގެ ހުނަރުވެރި މިޑްފީލްޑަރު, ޕައުލް ޕޮގްބާގެ ކޮންޓްރެކްޓް އުވާލައިފިއެވެ.
މީޑިއާތަކުން ރިޕޯޓުކުރާ ގޮތުގައި ޔުވެންޓަސްއިން ކޮންޓްރެކްޓް އުވާލައިފައިވަނީ ޕޮގްބާ ވެސް އެ ގޮތް ބޭނުންވާތީއެވެ. ޕޮގްބާގެ ކޮންޓްރެކްޓް ރަސްމީކޮށް އުވިގެންދާނީ 30 ނޮވެންބަރު ވާ ދުވަހުއެވެ.
ޔުވެންޓަސްއާއެކު ހަދާފައިވާ ކޮންޓްރެކްޓް އުވާލުމާއެކު ޕޮގްބާ ވަނީ ސޯޝަލް މީޑިއާގައި އެ ކްލަބުގެ ސަޕޯޓަރުންނަށް އަލްވަދާއު ކިޔާފައެވެ. ޕޮގްބާ އާއްމު ކުރި ޕޯސްޓުގައި ވަނީ, އޭނާއަށް ހިތްވަރުދިން ހުރިހާ ފަރާތްތަކަށް ޝުކުރު އަދާ ކޮށް, އަބަދު ވެސް ޔުވެންޓަސްއަށް ހެވަށް އެދޭނެ ކަމަށް ބުނެފައެވެ.
އުމުރުން 31 އަހަރުގެ ޕޮގްބާ މި ވަގުތު ހުރީ ޑޯޕިން މައްސަލައެއްގައި 18 މަހުގެ ސަސްޕެންޝަނެއް މަތީގައެވެ. އެހެންކަމުން އެހެން ކްލަބަކަށް ސޮއިކޮށް, އެނބުރި ކުޅުމުގެ ތެރެއަށް އޭނާއަށް އާދެވޭނީ ދެން އަންނަ އަހަރުގެ މާރިޗް މަހުގައެވެ.
