ޔުޓެރައިން ނުވަތަ ރަހިމުގެ ފައިބްރޮއިޑްއަކީ އަންހެނުންގެ ދަރިމައިވާ އުމުރުގައި އާންމުކޮށް ޖެހޭ ބައްޔެކެވެ. މިއީ ރަހިމުގައި އުފެދޭ ކެންސަރު ނޫން ސެލްތަކެކެވެ. މި ބައްޔަށް "ލެއިމައޯމާސް" ނުވަތަ "މައޯމާސް" އޭވެސް ކިޔައެވެ.
ޔުޓެރައިން ފައިބްރޮއިޑް އުފެދެނީ ރަހިމުގެ ތެރޭގައި، ބޭރުގައި އަދި ރަހިމުގެ ފާރުގައެވެ. މި ސެލްތަކުގެ ސައިޒު ތަފާތުވެއެވެ. ބައެއް ފަހަރު ވަރަށް ކުދި، އަނެއްބައިފަހަރު ބައިވަރު ސެލްތަކެއް އުފެދި ބޮޑުވެ، ރަހިމާއި ބަނޑުގެ ސައިޒަށް ބަދަލު ގެނެއެވެ.
ގިނަ އަންހެނުންނަށް މި ބަލީގެ އެއްވެސް އަލާމާތެއް ނުފެނުނު ނަމަވެސް، ބައެއް އަންހެނުންނަށް ވަރަށް ބޮޑެތި އުނދަގޫތަކާ ކުރިމަތިލާން ޖެހެއެވެ. މީގެ ތެރޭގައި ޕީރިއަޑް ޕެއިން އިތުރުވުން، ބަނޑުގެ ތިރީބައިގައި ރިއްސުން، ގިނަގިނައިން ކުޑަކަމުދާން ޖެހުން، ކޮންސްޓިޕޭޝަން އަދި ބަނޑު ފުފުން ހިމެނެއެވެ. ބައެއް ހާލަތްތަކުގައި މި އުފެދޭ ސެލްތަކަށް ލިބޭ ލޭ މަދުވުމުގެ ސަބަބުން ވަރަށް ތޫނު ރިއްސުމާކާ ކުރިމަތިލާންވެސް ޖެހިދާނެއެވެ.
ރަހިމުގެ ފައިބްރޮއިޑް ޖެހޭ ސަބަބު މިހާތަނަށް ސާފުކޮށް އެނގިފައި ނުވިނަމަވެސް، ޖެނެޓިކް ބަދަލުތަކާއި، އެސްޓްރޮޖެން އަދި ޕްރޮޖެސްޓެރޯން ފަދަ ހޯމޯންތަކުގެ ސަބަބުން މި ބަލި ޖެހުމުގެ ފުރުޞަތު ބޮޑުވެއެވެ. އާއިލާގެ މެންބަރުންގެ ތެރޭގައި މި ބަލި ޖެހިފައިވާ ނަމަ، ހަށިގަނޑުގެ ބަރުދަން އިތުރުވެފައިވާ ނަމަ އަދި މާ ޅަ އުމުރުގައި ޕީރިއަޑްވާން ފެށިއްޖެނަމަ މި ބަލި ޖެހުމުގެ ފުރުޞަތު ބޮޑުވެއެވެ. މީގެ އިތުރުން، ކަޅު ނަސްލުގެ އަންހެނުންނަށް މި ބަލި ޖެހުމުގެ ފުރުޞަތު އިތުރުކަމަށްވެސް ފާހަގަކުރެވިފައިވެއެވެ.
މި ބަލީގެ ސަބަބުން ލޭ މަދުވުމާއި، ބަނޑުބޮޑުއިރު އިތުރު މައްސަލަތަކެއް ދިމާވުމާއި، މުއްދަތު ހަމަނުވެ ވިހެއުން ފަދަ އުނދަގޫތަކާ ކުރިމަތިލާން ޖެހިދާނެއެވެ.
ރަހިމުގެ ފައިބްރޮއިޑް ފުރިހަމައަށް ހުއްޓުވުމަކީ ކުރެވިދާނެ ކަމަކަށް ނުވިޔަސް، ދިރިއުޅުމުގެ ވައްޓަފާޅިއަށް ބައެއް ބަދަލުތައް ގެނައުމުން މި ބަލި ޖެހުމުގެ ފުރުޞަތު ކުޑަކުރެވިދާނެއެވެ. މިގޮތުން، ހަށިގަނޑުގެ ހެޔޮ ބަރުދަނެއް ހިފެހެއްޓުމާއި، ގަވާއިދުން ކަސްރަތު ކުރުމާއި، މޭވާއާއި ތަރުކާރީ ގިނައިން ހިމެނޭ ކާނާ ކެއުމަކީ މުހިންމު ކަންކަމެވެ.
ބައެއް ދިރާސާތަކުން ދައްކާ ގޮތުގައި، ބާރތު ކޮންޓްރޯލް ކުރާ ބޭސް ނުވަތަ ޕްރޮޖެސްޓިން އެކަނި ހިމެނޭ ހޯމޯން ބޭސްތައް ބޭނުންކުރުމުން ފައިބްރޮއިޑް އުފެދުމުގެ ފުރުޞަތު ކުޑަވެއެވެ. ނަމަވެސް، 16 އަހަރު ނުވަނީސް މިފަދަ ބޭސްތައް ބޭނުންކުރަން ފެށުމުން ފައިބްރޮއިޑް ޖެހުމުގެ ފުރުޞަތު އިތުރުވެދާނެއެވެ.
މި ބަލީގެ އަލާމާތްތައް ފެނިއްޖެ ނަމަ، ލަސްނުކޮށް ޑޮކްޓަރަކަށް ދެއްކުމަކީ މުހިންމު ކަމެކެވެ. މި ބަލި ރަނގަޅަށް ދެނެގަތުމަށްޓަކައި ދިރާސާތައް ކުރިއަށްދާ ކަމަށް ޞިއްޙީ މާހިރުން ބުނެއެވެ.
މި އާޓިކަލްގެ ހިމެނިފައިވާ މަޢުލޫމާތު ހޯދާފައިވަނީ މޭޔޯ ކްލިނިކް އިންނެވެ.
