ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ހިދުމަތް މުޅި ރާއްޖެއަށް ފުޅާކުރުމުގެ މަސައްކަތް، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު އިފްތިތާހުކުރައްވައިފިއެވެ.

މި ހިދުމަތް އިފްތިތާޙުކޮށްދެއްވާފައިވަނީ މިކަމަށް ހާއްސަކޮށް، މިއަދު ރައީސް އޮފީހުގައި ބޭއްވި ޖަލްސާއެއްގައެވެ.

މި މަސައްކަތުގެ ދަށުން މާލެ ސިޓީގެ ހުރިހާ ސަރަޙައްދެއްގެ އިތުރުން ލ. އަތޮޅާއި ދ. އަތޮޅަށް މި މަސައްކަތް ވަނީ ފުޅާކޮށްފައެވެ. އެގޮތުން، ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ. ކުޑަހުވަދޫ އަދި ލ. ފޮނަދޫއިން ޕާސްޕޯޓުގެ ހިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

ދިވެހިރައްޔިތެއްކަން އަންގައިދޭ ކާޑުގެ ހިދުމަތް މާލެ ސިޓީގެ ހުރިހާ ސަރަޙައްދެއްގެ އިތުރުން ހދ. އަތޮޅަށް ވަނީ ފުޅާކޮށްފައެވެ. އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ އަދި ކުޅުދުއްފުށީ ސިޓީއިން ދިވެހި ރައްޔިތެއްކަން އަންގައިދޭ ކާޑުގެ ޚިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

މިއަދުގެ ޖަލްސާގައި ވަނީ، ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަގުޗާޓު ވެސް ހިއްސާކުރައްވާފައެވެ. 2025 ވަނަ އަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައިވެސް ކަނޑައެޅޭ ވަކި ސަރަހައްދުތަކުގައި މި ހިދުމަތްތައް ގާއިމުކުރުމަށް ވަނީ ނިންމާފައެވެ. އެގޮތުން:

  • 2024 ވަނަ އަހަރުގެ ނޮވެންބަރު މަހުގެ ނިޔަލަށް ދ. ކުޑަހުވަދޫ އާއި ހދ. ކުޅުދުއްފުށީގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ ފެބްރުއަރީ މަހުގެ ނިޔަލަށް ހދ. މަކުނުދޫގައި ހިދުމަތް ގާއިމުކުރުމަށާއި،
  • 2025 މާރިޗުމަހުގެ ނިޔަލަށް ގދ. ތިނަދޫ އަދި ގދ. ގައްދޫގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ އެޕްރިލް މަހުގެ ނިޔަލަށް އައްޑޫ ސިޓީގެ ހިތަދޫ އާއި ހުޅުމީދޫގައްޔާއި ފުވައްމުލައް ސިޓީގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ މޭމަހުގެ ނިޔަލަށް ހއ. ދިއްދޫ، ހއ. އިހަވަންދޫ، ރ. އުނގޫފާރު އަދި ރ. އަލިފުށީގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ ޖޫންމަހުގެ ނިޔަލަށް، ށ. މިލަންދޫ އާއި ށ. ފުނަދޫ އާއި ލ. ފޮނަދޫގައި ދިވެހި ރައްޔިތެއްކަން އަންގައިދޭ ކާޑުގެ ހިދުމަތް ގާއިމުކުރުމަށާއި،
  • 2025 ވަނަ އަހަރުގެ ޖުލައި މަހުގެ ނިޔަލަށް ނ. ވެލިދޫ އާއި ތ. ވޭމަންޑޫގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ އޯގަސްޓު މަހުގެ ނިޔަލަށް އދ. މަހިބަދޫ އާއި ބ. ދަރަވަންދޫގައި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ ސެޕްޓެމްބަރު މަހުގެ ނިޔަލަށް ޅ. ނައިފަރު އަދި ފ. ނިލަންދޫގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ އޮކްޓޯބަރ މަހުގެ ނިޔަލަށް، މ. މުލި އަދި އއ. ރަސްދޫގައި މި ހިދުމަތް ގާއިމުކުރުމަށާއި،
  • 2025 ވަނަ އަހަރުގެ ނޮވެމްބަރު މަހުގެ ނިޔަލަށް ވ. ފެލިދޫ، ކ. ތުލުސްދޫ އަދި ކ. ގުރައިދޫގައި މި ހިދުމަތް ގާއިމުކުރުމަށް ވަނީ ހަމަޖެހިފައެވެ.

ރައްޔިތުންނަށް ބޭނުންވާ އަސާސީ ހިދުމަތްތައް ރައްޔިތުން ތިބި ހިސާބަކުން ފޯރުކޮށްދެއްވުމަކީ، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ރިޔާސީ ވައުދެކެވެ.