ރައީސުލްޖުމްހޫރިއްޔާގެ އޮފީހުގައި ބޭއްވުނު ރަސްމިއްޔާތެއްގައި ބ. އޭދަފުށީގައި 1،000 ހައުސިންގް ޔުނިޓް އިމާރާތްކުރުމުގެ މަސައްކަތް ޗައިނާގެ ސިނޯހައިޑްރޯއާ ހަވާލުކުރުމުގެ އެއްބަސްވުމުގައި ސޮއިކުރެވިއްޖެއެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައިވެރިވެ ވަޑައިގެންނެވިއެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ އިމާރާތްކުރުމާއި ބިނާވެށި ތަރައްޤީކުރުމުގެ ވަޒީރު ޑރ. އަބްދުﷲ މުއްޠަލިބެވެ. މިއީ މިއަހަރުގެ މޭ މަހުގެ 8 ވަނަ ދުވަހު މި ދެ ފަރާތުން ސޮއިކުރި ފަހުމުނާމާގެ ދަށުން ކުރިއަށްގެންދެވުނު މަސައްކަތްތަކުގެ ނަތީޖާއެކެވެ.
ރަސްމިއްޔާތުގައި ވާހަކަފުޅު ދައްކަވަމުން ޑރ. މުއްޠަލިބު ވިދާޅުވީ މި މަޝްރޫޢުގެ ދަށުން 15 ފަންގިފިލާގެ 12 ޓަވަރު އިމާރާތްކުރެވޭނެ ކަމަށެވެ. މީގެ ތެރޭގައި 3 ކޮޓަރީގެ 336 ފްލެޓާއި 2 ކޮޓަރީގެ 672 ފްލެޓު ހިމެނެއެވެ. އަދި އޭދަފުށްޓަކީ ރާއްޖޭގައި ތަރައްޤީކުރާ އަރބަން ސެންޓަރުތަކުގެ ތެރެއިން ތަރައްޤީގެ ނާރެހެއްގެ ްގެ ގޮތުގައި ކުރިއަރައިގެންދާނެ ރަށެއް ކަމަށްވެސް އެމަނިކުފާނު ވިދާޅުވިއެވެ.
މި ހައުސިންގ ޔުނިޓުތަކަކީ އޭދަފުށްޓާއި އެ ސަރަޙައްދުގެ ރިސޯޓުތަކުގައި މަސައްކަތްކުރާ ފަރާތްތަކަށް ބޯހިޔާވަހިކަން ލިބިގެންދާނެ ފުރުޞަތެއް ކަމުގައިވެސް ވަޒީރު ފާހަގަކުރެއްވިއެވެ. މި މަޝްރޫޢަކީ ސަރުކާރުން ކުރިއަށްގެންދާ ބޯހިޔާވަހިކަމުގެ ސިޔާސަތުގެ ދަށުން ހިންގޭ އެއް މަޝްރޫޢު ކަމަށްވާއިރު، މިކަމުން އޭދަފުށީގެ އިޖްތިމާޢީ އަދި އިޤްތިޞާދީ ދުވެލި އިތުރުވެ، ގިނަ ވަޒީފާގެ ފުރުޞަތުތަކެއް އުފެދިގެންދާނެ ކަމަށް ބެލެވެއެވެ.
