ފަހަކަށް އައިސް، ވޭޕްކުރުން ވަނީ މަޤްބޫލު ކަމަކަށް ވެފައެވެ. އަދި ގިނަ ފަހަރަށް މިއީ އާންމު ސިނގިރޭޓް ބުއިމަށްވުރެ ރައްކާތެރި ގޮތެއް ކަމުގައި ވިޔަފާރިކުގިނަ މީހުން ދެކެއެވެ. އެހެންނަމަވެސް، ގިނަ ދިރާސާތަކުން ދައްކާގޮތުގައި ވޭޕް ކުރުމާއި ގުޅިގެން އަމިއްލަ ޞިއްޙަތަށް ނުރައްކާތަކެއް އެބަހުއްޓެވެ. އާންމު ގޮތެއްގައި މިއީ މާ ގެއްލުން ބޮޑު ކަމެއް ނޫން ކަމަށް ފެނުނު ނަމަވެސް، ޙަޤީޤަތަކީ ވޭޕް ކުރުމަކީ ޖިސްމާނީ އަދި ނަފްސާނީ ޞިއްޙަތަށް ވަރަށް ބޮޑެތި ގެއްލުންތަކެއް ކުރިމަތިވެދާނެ ކަމެވެ.
ޖިސްމާނީ ޞިއްޙަތަށް ކުރިމަތިވާ ނުރައްކާތައް
ވޭޕްކުރުމުގެ ސަބަބުން ނޭވާލުމުގެ ނިޒާމަށް ގެއްލުން ލިބެއެވެ. މިގޮތުން،ނިކޮޓިން، ރަހަ އަދި އެކި ބާވަތުގެ ކެމިކަލްތައް ހިމެނޭ އެއަރޮސޯލްތައް ނޭވާލުމުން މި ތަކެތިން ފުއްޕާމެއަށް ރިއްސުމާއި ގެއްލުން ލިބިދާނެއެވެ. ދިރާސާތަކުން ދައްކާގޮތުގައި ވޭޕިންގ އާއި ގުޅިގެން ޕޮޕްކޯން ލަންގ (ބްރޮންކިއޯލައިޓިސް އޮބްލިޓަރަންސް) އަދި ވޭޕިންގ އާއި ގުޅުންހުރި ފުއްޕާމޭގެ ގެއްލުން (އީވީއޭއެލްއައި) ފަދަ ބަލިތައް ޖެހިދާނެއެވެ. މީގެ އަލާމާތްތަކުގެ ތެރޭގައި ކެއްސުމާއި، ނޭވާ ކުރުވުމާއި، މޭމަތި ރިއްސުން ހިމެނެއެވެ. މީގެއިތުރުން، ވޭޕް ކުރުމުގެ ސަބަބުން ހަށިގަނޑުގެ ދިފާޢީ ނިޒާމް ބަލިކަށިވެ، ބަލިތަކަށް ހަށިގަނޑު ހުޅުވިގެންދެއެވެ. ދިރާސާތަކުން ދައްކާގޮތުގައި އީ-ސިނގިރޭޓް ވޭޕަރުގައި ހުންނަ ކެމިކަލްތަކުން ފުއްޕާމޭގައި ހުންނަ ދިފާޢީ ސެލްތަކުގެ މަސައްކަތަށް ހުރަސްއެޅެއެވެ.
ނަފްސާނީ ސިއްހަތަށް ކުރާ އަސަރުތައް
ވޭޕް ކުރުމުން ޒުވާނުންގެ ސިކުނޑީގެ ތަރައްޤީއަށް ހުރަސްއެޅިދާނެއެވެ. މިކަމުގެ ސަބަބުން ހަނދާން ބަލިކަށިވުމާއި، ސަމާލުކަން ދިނުމުގެ ޤާބިލުކަން ދަށްވުމާއި، އުނގެނުމުގައި ދަތިތަކާ ކުރިމަތިވެދާނެއެވެ. ހަމައެހްނެމެ، ނިކޮޓިންގެ ވަށްކަމުގެ ސަބަބުން އޭގެ އަސަރު ކެނޑުމުން އަންނަ އަލާމާތްތަކުގެ ތެރޭގައި ފަސޭހައިން ރުޅިއައުމާއި، ހިތްހަމަނުޖެހުމާއި، މޫޑު ބަދަލުވުން ހިމެނެއެވެ. ވަގުތު ފާއިތުވަމުންދާއިރު، މި ދައުރު ނަފްސާނީ ދުޅަހެޔޮކަމަށް ބޮޑު އަސަރެއް ކޮށްފާނެއެވެ.
ވޭޕްކުރުމަކީ އަކީ ގިނަފަހަރު ސިނގިރޭޓް ބުއިމަށްވުރެ ރައްކާތެރި ގޮތެއްގެ ގޮތުގައި މާކެޓްކުރެވޭ އެއްޗެއް ނަމަވެސް، ޖިސްމާނީ އަދި ނަފްސާނީ ސިއްހަތަށް މިކަމުން ކުރާ އަސަރު ވަރަށް ބޮޑެވެ. ނޭވާލުމުގެ ނިޒާމުގެ މައްސަލަތަކުން ފެށިގެން ވިސްނުމުގެ ބަލިކަށިކަމާ ހަމައަށް، މީގެ ނުރައްކާތައް ވަރަށް ބޮޑެވެ. މި ނުރައްކާތައް ދެނެގަތުމުން، މީހުންނަށް އެމީހުންގެ ސިއްހަތާއި ދުޅަހެޔޮކަމާ ބެހޭގޮތުން އިތުރަށް މަޢުލޫމާތު ލިބިގެން ނިންމުންތައް ނިންމިދާނެއެވެ.
ތިބާއަށް ނުވަތަ ތިބާ ދަންނަ މީހަކަށް ވޭޕްކުރުމުގެ މައްސަލައެއް ދިމާވެފައިވާނަމަ، އެހީތެރިކަން ހޯދުމަކީ ރަނގަޅުވުމަށް އެޅޭ މުހިންމު ފުރަތަމަ ފިޔަވަޅެކެވެ.
