އިޒްރޭލާއެކު ގުޅުމެއް ނުބާއްވާ ކަމަށް ބުނެ މޮޅު، ބޮޑެތި ބަޔާންތައް ތުރުކީން ދެމުން ދެއެވެ. ނަމަވެސް ތުރުކީ އަކީ ޒަޔަނިސްޓު ޓެރަރިސްޓު އިޒްރޭލަށް ބޭނުންވާ މުހިންމު ދެ މާއްދާ ސަޕްލައިކޮށްދޭ ގައުމުކަމަށް މީޑިއާގައި ފާހަގަ ކުރެއެވެ. އެއީ ތުރުކީ މަގުން ސަޕްލައި ކުރާ އަޒްރުބައިޖާނުގެ ތެލާއި ތުރުކީން ސަޕްލައި ކުރާ ދަނގަނޑެވެ. ދެބާވަތްވެސް ގޮސް ނިމެނީ ފަލަސްޠީނުގެ ނަސްލު ނައްތާލާ އަސްކަރީ ޔަހޫދީ ޒަޔަނިސްޓް މެޝިނަރީ އުފެއްދުމަށެވެ.
ޔަމަނުގެ އަންޞާރުﷲ ޖަމާޢަތުން އިއްޔެ އާގު ބޯޓަކަށް ދިން ހަމަލައިން ތުރުކީ އިތުރަށް ބޭޒާރުވެއްޖެއެވެ.
އަންސާރުﷲގެ ތަރުޖުމާން، މޭޖަރ ޖެނަރަލް ޔަޙުޔާ ސަރީޢު އިއުލާން ކުރެއްވި ގޮތުގައި ހިފާފައިވާ ފަލަސްޠީނުގެ ބަނދަރަށް އެއްވެސް އާގު ބޯޓަކުން ވަނުމަށް މަނާކޮށްފައި ވަނިކޮށް އެ އަމުރަށް ނުކިޔަމަންތެރިވެ، ހިފާފައިވާ ފަލަސްޠީނަށް ވަންނަން ދިމާކުރި އާގުބޯޓަކަށް ޙޫސީން މިސައުލުން ހަމަލަ ދީފައިވާނެއެވެ. އަދި މިސައިލް ހަމަލަ އަމާޒު ކުރި ބޯޓަކީ އަނާޟޯލް އެސް ކަމަށްވެސް އޭނާ ވިދާޅުވިއެވެ.
ފަހުން އެނގުނު ގޮތުގައި މި ބޯޓަކީ ޕެނަމާގައި ރަޖިސްޓްރީކޮށްފައިވާ ތުރުކީގެ ބޯޓެކެވެ. ތުރުކީ ސަރުކާރުން ވަނީ އަންސާރުﷲ އިން ދިން ހަމަލާގެ މައްސަލައިގައި ޔަމަނަށް އިންޒާރު ދީފައެވެ.
އަންސާރުﷲ އިން ދަނީ ރެޑްސީއާއި ބާބުލްމަންދަބްއާއި ޢަދަން ކަނޑު އޮޅީގައި ހަރަކާތްތެރިވާ އާގުބޯޓުތަކަށް ފާރަވެރިވަމުންނެވެ. އަދި އެއްވެސް ބޯޓަކުން ހިފާފައިވާ ފަލސްޠީނުގެ ބަނދަރަކަށް ގާތް ކުރުމަކީ މަނާ ކަމެކެވެ. އަންސާރުﷲގެ އިންޒާރާ ހެދި ހިފާފައިވާ ފަލަސްޠީނުގައި އިންދާފައިވާ އިޒްރޭލުން ހަދާފައިވާ އީލާތު ބަނދަރު ވަނީ އިފްލާސްވެއްޖެކަމަށް ކަނޑައަޅާފައެވެ.
