ޕަލާއޯގެ ރައީސް ސުރަންޖެލް ވިޕްސް ޖޫނިއާ ވަނީ ޗައިނާގެ އަމަލުތަކުން ޕަލާއޯގެ އިސްތިގުލާލަށް ބުރޫއަރާ ކަމަށް ވިދާޅުވެ، ބެއިޖިންގއިން ބައިނަލްއަގްވާމީ ގާނޫނަށް އިހުތިރާމް ކުރުމަށް ގޮވާލާއްވާފައެވެ. ޕަލާއޯއަކީ، ޓައިވާންގެ ރައީސްގެ ޕެސިފިކް ދަތުރުފުޅުގެ އެއް މަންޒިލެވެ. އަދި ބެއިޖިންގއަށް ޕަލާއޯގެ ރައީސް ބަހުގެ ހަމަލަތައް ދެއްވީ، ޓައިވާނުގެ ރައީސް ލައި ޗިންގް ޓެ، ޕަލާއުއަށް ވަޑައިގަތުމުގެ ކުރިންނެވެ.
ރައީސް ވިޕްސް ވަނީ ޕަލާއު އިން ޓައިވާނަށް ސަޕޯޓު ކުރުމުގައި ދެމި އޮންނާނެ ކަމުގައި އިއްޔެ ދެއްވި އިންޓަރވިއުގައި ވިދާޅުވެފައެވެ. އަދި ޕަލާއޯއާއި ޓައިވާންގެ 25 އަހަރުގެ ޕާޓްނަޝިޕް އަދި އިތުރު އެތައް އަހަރަކަށް ދެމިއޮންނާނެ ކަމަށް ވެސް ވިދާޅުވެފަ އެވެ.
ވިޕްސް ވިދާޅުވާ ގޮތުގައި ޗައިނާއިން ދަނީ ޕަލާއޯއަށް ޓައިވާނާ ދެކޮޅަށް ފިއްތަމުންނެވެ. އެހެންވެ، އޭނާ ގޮވައި ލައްވަނީ، ޗައިނާއިން ޕަލާއޯގެ އިސްތިޤްލާލަށް އިޙުތިރާމް ކުރުމަށެވެ.
ޕެސިފިކްގެ ޖަޒީރާ ޤައުމުތަކުގެ ތާއީދު ހޯދުމުގެ ގޮތުން ޗައިނާއިން ވަނީ އިގްތިސާދީ އިނާޔަތްތައް އިތުރު ކޮށް، ޑިޕްލޮމެޓިކް ޕްރެޝަރުތައް ބޭނުން ކުރަން ފަށާފަ އެވެ.
ޕަލާއޯއިން ބުނާ ގޮތުގައި ޗައިނާއިން އެގައުމަށް ސައިބަރ އެޓޭކްތައް ދެމުން ދެއެވެ. އަދި މިއަހަރުގެ ކުރީކޮޅު ޕަލާއޯގެ 20،000 އަށް ވުރެ ގިނަ ލިޔެކިޔުން ސައިބާ ހަމަލައެއްގައި ވަގަށް ނަގާފައިވާ ކަމަށް ވެސް ބުނެފައި ވެއެވެ.
ޗައިނާގެ ރިސާޗް އުޅަނދުތަކުން ޕަލާއޯގެ އެކްސްކްލޫސިވް އިގްތިސާދީ ޒޯނަށް ގަވާއިދާ ހިލާފަށް ދެ ފަހަރެއްގެ މަތިން މިދިޔަ މަހު ވަދެފައިވާކަމަށް ވެސް ޕަލާއޯގެ ރައީސް ވިދާޅުވެއެވެ.
ޕެސިފިކް ކަނޑުގައި ޕަލާއޯގެ ސްޓްރެޓެޖިކް ލޮކޭޝަނާއި އެމެރިކާ، ޓައިވާން އަދި ޖަޕާނާ އެކު އެގައުމުން ޗައިނާއާ ދެކޮޅަށް އިއްތިހާދު ވުމުން ޖިއޮޕޮލިޓިކަލް ޓެންޝަންގެ މަރުކަޒަކަށް ޕަލާއޯ ވެފައި ވެއެވެ. އެމެރިކާއިން ދަނީ އެ ސަރަހައްދުގައި އަސްކަރީ މަގާމުތައް ވަރުގަދަ ކުރަމުންނެވެ.
