ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖޭގެ ޒައާމަތާއި ހަވާލުވެވަޑައިގަތީ ދިވެހި ރައްޔިތުންނަށް އެެކި ގޮތްގޮތުން ކުރިމަތިވެފައި ހުރި ތަކުލީފްތަކާއި އުނދަގޫތަކަށް ހައްލުތައް ގެނެސްދެއްވުމުގެ އަޒުމްފުޅުގައެވެ. އެގޮތުން ހައްޖާއި ގުޅުންހުރި ކަންކަމުގައި އުފުލަންޖެހޭ ތަކުލީފުތަކަށް ނިމުމެއް ގެނެސްދެއްވުމަކީ އެމަނިކުފާނުގެ ވައުދެކެވެ.

ހައްޖާއި ގުޅުންހުރި ކަންކަން ހަރުދަނާ ކުރެއްވުމުގެ އިތުރުން ޙައްޖުގެ އަޅުކަން އަދާކުރުމުގެ ކެރިފޯރުންތެރިކަން ލިބިފައިނުވާ 1000 ރައްޔިތުން، އެމަނިކުފާނުގެ ޒަޢާމަތުގެ ފުރަތަމަ 5 އަހަރުގެ ތެރޭގައި، ސަރުކާރުގެ ޚަރަދުގައި ޙައްޖަށް ފޮނުއްވައިދެއްވުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދެކެވެ.

ރިޔާސީ ފުރަތަމަ ދައުރުގައި 1000 ފަޤީރުން ޙައްޖަށް ފޮނުއްވާނޭކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރެއްވީ 18 އޮގަސްޓް 2023 ވަނަ ދުވަހުގެރޭ، ރިޔާސީ އިންތިޚާބުގެ ފުރަތަމަބުރުގެ ކެމްޕޭނުގައި، މ. މުލަކު ރައްޔިތުންނާ މުޚާޠަބުކުރައްވާ ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާކަމުގެ މަޤާމާ އެމަނިކުފާނު ޙަވާލުވެވަޑައިގަތްތާ 3 ވަނަ ހަފުތާ ތެރޭގައި ރިޔާސީ ދައުރުގައި އަންނަ ފުރަތަމަ ޙައްޖު މޫސުމުގައި، ސަރުކާރުގެ ޚަރަދުގައި 50 ފަޤީރުން ޙައްޖަށް ފޮނުއްވުމަށް ނިންމަވައި އެކަން ވަނީ އިޢުލާނުކުރައްވާފައެވެ.

ދަޢުލަތުގެ ޚަަރަދުގައި ޙައްޖަށް ގެންދާނެ މީހުން ކަނޑައެޅުމަށް ފަގީރުންގެ ލިސްޓުގައި މިދިޔަ އަހަރު ތިބި މީހުންގެ ތެރެއިން ޝަރުޠު ހަމަވާ 982 މީހުންނާއި އިންޓަރވިއުކޮށް، އެމީހުންގެ ތެރޭގައި ޝަރުތު ހަމަވާ 667 މީހުން ތިބިއިރު އޭގެ ތެރެއިން ފުރަތަމަ ފޮނުވާނެ 50 މީހުން ހޮވާފައިވަނީ ފޭސްބުކް މެދުވެރިކޮށް އާއްމުކޮށް ދުރަށް ދެއްކި ލައިވްއެއްގައި ގުރުއަތުންނެވެ.

ޙައްޖުގެ ކަންކަން ހަރުދަނާކުރެއްވުމަށް ރައީސް ވެލައްވާފައިވާ ވަޢުދުގެ ދަށުން، ދިވެހިރާއްޖެއަށް ލިބޭ ހުރިހާ ރަސްމީ ޙައްޖު ކޯޓާއެއް މިއަހަރު ދަޢުލަތުގެ ޙައްޖު ކުންފުނި، ޙައްޖު ކޯޕަރޭޝަނާއި ހަވާލުކޮށްފައިވާއިރު، ޙައްޖު ފަންޑު ޝަރީޢާ ހުއްދަކުރާ ދާއިރާތަކުގައި އިންވެސްޓްކޮށް، ލުއި އަގެއްގައި ޙައްޖަށް ދިޔުމުގެ މަގު ފަހިކުރުމަށް ކަނޑައަޅުއްވާފައިވާ ސިޔާސަތު ތަންފީޛުކުރުމުގެ ގޮތުން، ކެބިނެޓް ކަރުދާހެއް ވަނީ ރައީސުލްޖުމްހޫރިއްޔާގެ އޮފީހަށް 08 އޮގަސްޓް 2024 ގައި ހުށަހަޅާފައެވެ.

ހައްޖާއި ގުޅޭ ކަންކަމުގެ އިތުރުންވެސް، ރާއްޖޭގައި އިސްލާމީ ނޫރާއި ދީނީ އަޤީދާ ވަރުގަދަކުރެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ގެންދަވަނީ ގިނަ މަސައްކަތްތަކެއް ކުރައްވަމުންކަން ފާހަގަކުރެއްވެއެވެ.

https://sarukaaru.gov.mv/articles/5788

އިތުރު ލިޔުންތައް އިސްލާމިކް މިނިސްޓްރީ ދީނީ ވާހަކަ