ނޫސްވެރިންގެ ކަންބޮޑުވުންތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ބަންޑާރަނައިބު އަލްއުސްތާޒު އަހުމަދު އުޝާމް ދެއްވައިފިއެވެ.
އެމަނިކުފާނު އެކަމުގެ ޔަގީންކަން ދެއްވައިފައިވަނީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި ބައްދަލުކުރައްވާ، މަޖިލީހަށް ހުށަހެޅިފައިވާ މީޑިއާ ބިލާ ގުޅިގެން ނޫސްވެރިންގެ ޝަކުވާތައް އަޑުއެއްސެވުމަށް ފަހުއެވެ.
މި ކަމާ ގުޅިގެން އޭޖީ އޮފީހުން ވަނީ މިއަދު "އެކްސް" ގައި ކުރި ޕޯސްޓެއް ކުރައްވާފައެވެ.
އެ ޕޯސްޓްގައި އެޖީއޯއިން ވިދާޅުވެފައިވަނީ އެ ބައްދަލުވުމުގައި މަޖިލީހަށް ހުށަހެޅިފައިވާ މޯލްޑިވްސް މީޑިއާ އެންޑް ބްރޯޑްކާސްޓިންގ ބިލާ ގުޅޭ ގޮތުން ހުރި ޝަކުވާތައްވެސް ބަންޑާރަނައިބު އަލްއުސްތާޒު އަހުމަދު އުޝާމް އަޑުއައްސަވާފައިވާ ކަމަށެވެ.
މިބައްދަލުވުމުގައި ބަންޑާރަނައިބުގެ އިތުރުން، ޒުވާނުން ބާރުވެރިކުރުވުމާއި، މައުލޫމާތާއި ފަންނާ ބެހޭ ވަޒީރު އިބްރާހީމް ވަހީދާއި، މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހީމް ހަލީލް ބައިވެރިވެ ވަޑައިގެންނެވިއެވެ.
މި ބައްދަލުވުމާ ގުޅިގެން އެމްޖޭއޭއިން ބުނީ އެ ބިލަށް އެޓާނީ ޖެެނެރަލާއި އިންފޮމޭޝަން މިނިސްޓަރާއި ސަރުކާރުން ތާއީދު ނުކުރާކަމުގެ ޔަގީންކަން ދެއްވުމަކީ ލިބުނު ހިތްވަރެއް ކަމަށެވެ. އަދި އެ ޖަމުއިއްޔާއިން އިންތިޒާރު ކުރަމުންދަނީ ރަސްމީ ސިފައެއްގައި ސަރުކާރުން އެ ބިލު ބާތިލު ކުރާނެ ވަގުތަކަށް ކަމަށްވެސް އެ ފަރާތުން އެކްސްގައި ކުރި ޕޯސްޓެއްގައި ބުނެފައިވެއެވެ.
