ގެވެށި އަނިޔާއިން ރައްކާތެރިކުރުވުމަށް މައުލޫމާތުދިނުމުގެ ސެޝަނެއް ޅ. ކުރެންދޫގައި ކުރިއަށް ގެންގޮސްފިއެވެ.
ކުރެންދޫ ޕޮލިސްޓޭޝަނާއި، އެރަށު ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެން މި ސެޝަން ކުރިއަށް ގެންގޮސްފައިވަނީ މި ނޮވެމްބަރު މަހުގެ 14 ވަނަ ދުވަހުއެވެ.
ފުލުހުން ބުނީ މި ސެޝަނުގައި، ގެވެށި އަނިޔާއަކީ ކޮބައިކަމާއި، ގެވެށި އަނިޔާއިން ރައްކާތެރިވުމަށް އެޅިދާނެ ފިޔަވަޅުތަކުގެ އިތުރުން، މިފަދަ އަމަލެއް ހިނގައިފިނަމަ އަމަލުކުރާނެ ގޮތްތަކާ ގުޅޭގޮތުން މައުލޫމާތުދީފައިވާ ކަމަށެވެ. އަދި ގެވެށި އަނިޔާ ލިބެމުންދާ ނުވަތަ އަނިޔާ ލިބިފައިވާ މީހެއްގެ ކިބައިން ފެންނާނެ ކަންތައްތަކާއި އެފަދަ މީހަކަށް އެހީތެރިކަން ފޯރުކޮށްދިނުމަށް ކުރެވިދާނެ ކަންކަމުގެ މައުލޫމާތު ހިއްސާކޮށްފައިވާ ކަމަށްވެސް ފުލުހުން ބުންޏެވެ.
މީގެ އިތުރުން، ގެވެށި އަނިޔާއިން ރައްކާތެރިވުމަށް ކުރެވިދާނެ ކަންކަމާއި ގެވެށި އަނިޔާ ހުއްޓުވުމުގެ ގާނޫނުން ލިބިދޭ ރައްކާތެރިކަމުގެ މައްޗަށް އަލިއަޅުވާލައި މައުލޫމާތު ހިއްސާކޮށްފައިވާ ކަމަށާއި އަދި މިފަދަ ކަމެއް ދިމާވެއްޖެނަމަ ލަސްނުކޮށް ރިޕޯޓު ކުރުމަށް އިލްތިމާސްކޮށްފައިވެއެވެ.
