މޯލްޑިވްސް ޕޯރޓްސް ލިމިޓެޑް (އެމްޕީއެލް) ގެ "ސީޓު އެއަރ ކާގޯ" ޚިދުމަތުން މިހާތަނަށް 3 މިލިއަން އެމެރިކާ ޑޮލަރަށްވުރެ ގިނަ އަދަދެއް ރާއްޖޭގެ އިޤްތިޞާދަށް ވަދެއްޖެކަމަށް އެމްޕީއެލްގެ ސީއީއޯ މުޙައްމަދު ވަޖީހް ވިދާޅުވެއްޖެއެވެ.
މިއީ ރާއްޖޭގެ އިޤްތިޞާދު ހަރުދަނާކުރުމަށް ރައީސް މުޢިއްޒުގެ ވެރިކަމުގެ ފުރަތަމަ އަހަރު ފެށްޓެވި މަސައްކަތްޕުޅުތަކުގެ ތެރެއިން އެއް މަސައްކަތެވެ.
އެމްޕީއެލްގެ ސީއީއޯ މުޙައްމަދު ވަޖީހު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވި ގޮތުގައި، މިއަހަރުގެ މެއި މަހު ފެށުނު މި ޚިދުމަތް ދަނީ ވަރަށް ބާރަށް ކުރިއަރަމުންނެވެ. އެގޮތުން، މިހާތަނަށް ކަނޑުމަގުން ރާއްޖެ އައި 210 ކޮންޓެއިނަރުން 1,008,000 ކިލޯގެ މުދާ ދުނިޔޭގެ އެކި ޤައުމުތަކަށް ވައިގެ މަގުން ފޮނުވާފައިވެއެވެ.
6 ވަރަކަށް މަސްތެރޭގައި 3 މިލިއަނަށް ވުރެ ގިނަ ޑޮލަރު އިޤްތިސާދަށް ވަދެ، ސީޓު އެއަރ ކާގޯ ޚިދުމަތަކީ ރާއްޖޭގެ އިޤްތިޞާދަށް ބޮޑު މަންފާއެއް ކުރާނެ ސިނާޢަތެއްގެ ގޮތުގައި ތަރައްޤީވަމުން އަންނަކަމަށް ސީއީއޯ ވަޖީހް ވިދާޅުވިއެވެ.
މި ޚިދުމަތުގެ ދަށުން މުދާ ފޮނުވޭ ޤައުމުތަކުގެ ތެރޭގައި އެމެރިކާ، ކެނެޑާ، އިނގިރޭސިވިލާތް އަދި ޔޫރަޕުގެ އެހެނިހެން ޤައުމުތައް ހިމެނެއެވެ. މި މުދާތައް ރާއްޖެއިން ބޭރަށް ގެންދިއުމުގައި 9 އެއަރލައިނަކުން ބައިވެރިވާކަމަށްވެސް ވަޖީހު ފާހަގަކުރެއްވިއެވެ.
