ޝާހްރުކް ޚާން އަދި ސަލްމާން ޚާންގެ މަޝްހޫރު ބޮލީވުޑް ފިލްމު "ކަރަން އަރްޖުން" މި މަހު ތިއޭޓަރުތަކުގައި އަލުން ދައްކަން ފަށާނެއެވެ.
މިއީ 1995 ގައި ނުކުތް މި ފިލްމު ފުރަތަމަ ދެއްކި ފަހުން ގާތްގަނޑަކަށް 30 އަހަރު ފަހުންނެވެ. ރާކޭޝް ރޯޝަން ޑައިރެކްޓްކޮށްފައިވާ މި އެކްޝަން ޑްރާމާ ފިލްމަކީ އިންޑިއާގެ ކަލްޓް ކްލާސިކްއެއްގެ ގޮތުގައި ފާހަގަކުރެވޭ ފިލްމެކެވެ.
އީޓައިމްސްއަށް ދީފައިވާ އިންޓަވިއުއެއްގައި ރާކޭޝް ރޯޝަން ވަނީ މި މަޝްހޫރު ފިލްމުގެ ސީކުއަލްއެއް ނުވަތަ ރީމޭކްއެއް ހެދުމުގެ އެއްވެސް ވިސްނުމެއް ނެތްކަމަށް ބުނެފައެވެ. ނަމަވެސް މިހާރުގެ ޒަމާނަށް ފެތޭގޮތަށް މި ފިލްމު އަލުން ހަދާނަމަ އޭނާގެ ޚިޔާލު ހިއްސާކުރަމުން ބުނެފައިވަނީ، "މިއަދު މި ފިލްމަށް އެހެން ދެ އެކްޓަރުން ހޮވާނަމަ، އަހަރެން ކަރަންގެ ރޯލަށް ހްރިތިކް ރޯޝަން އަދި އަރްޖުންގެ ރޯލަށް ރަންބީރް ކަޕޫރް ހޮވާނަމެވެ."
އަސްލު ފިލްމަށް ޝާހްރުކް ޚާން އަދި ސަލްމާން ޚާން ހޮވި ސަބަބު ބަޔާންކުރަމުން ރާކޭޝް ފާހަގަކޮށްފައިވަނީ ސަލްމާންގެ ޚާއްޞަ ޖިސްމާނީ ސިފަތަކާއި ލޮލުން އިޙްސާސްތައް ފާޅުކުރުމުގެ ޤާބިލްކަމަކީ ކަރަންގެ މަޑުމައިތިރި ނަމަވެސް ބާރުގަދަ ކެރެކްޓަރާ ވަރަށް ރަނގަޅަށް ދައްކުވައިދޭ ސިފަތަކެއްކަމަށެވެ. އަދި ޝާހްރުކްގެ ޖަޒުވާތީ ސިފައާ "ކިންގް އަންކަލް" އަދި "ފައުޖީ" ފިލްމުތަކުގައި ދައްކާފައިވާ ހުނަރުވެރިކަމުން އަރްޖުންގެ ރޯލަށް އެންމެ އެކަށޭނަ މީހާއަކީ އޭނާކަން ޔަޤީންވިކަމަށް ބުނެފައިވެއެވެ.
"ކަރަން އަރްޖުން" ފިލްމު ދުނިޔޭގެ އެކި ކަންކޮޅުތަކުގެ ތިއޭޓަރުތަކުގައި އަލުން ދައްކަން ފަށާނީ 22 ނޮވެމްބަރު 2024 ގައެވެ.
