ޔޫކްރައިނުގެ ބޭނުން އެމެރިކާ އާއި ހުޅަނގުން ހިފަނީ ރަޝިޔާއަށް ހަމަލާ ދިނުމަށް ކަމަށް އުތުރު ކޮރެއާގެ ލީޑަރު ކިމް ޖޮންގ އުން ވިދާޅުވެއްޖެއެވެ.
"ޔޫކްރައިނަކީ ރަޝިޔާއާ ދެކޮޅަށް ހުޅަނގުން ބޭނުން ކުރާ ފައުޖެއް. ޔޫކްރައިނުން ރަޝިޔާއާ ދެކޮޅަށް ކުރަމުންދާ ހަނގުރާމައަކީ ހުޅަނގުން ކުރާ ހަނގުރާމައެއް ކަމަށް ގަބޫލް ކުރަންޖެހޭ. ހުޅަނގުން ޔޫކްރައިން ބޭނުން ކުރަމުން ދަނީ ރަޝިޔާއާ ދެކޮޅަށް ހަނގުރާމަ ކުރާ ފައުޖެއް ގޮތުގައި. ހުޅަނގުން އެމީހުންގެ އައު ހަތިޔާރުތައް ތަޖުރިބާ ކުރަން ބޭނުން ކުރަނީ ޔޫކްރައިނުގެ ފައުޖުތައް. އެއީ ރަޝިޔާއާ ދެކޮޅަށް ކުރަމުންދާ ހަނގުރާމައިގެ ތެރެއިން. އަދި ދުނިޔޭގައި ހަންފެތުރުމަށްވެސް ހުޅަނގުން ބޭނުން އެކުރަނީ ޔޫކްރައިން" އުތުރު ކޮރެއާގެ ސެންޓްރަލް ނިއުސް އެޖެންސީއަށް ދެއްވި ބަސްދީގަތުމެއްގައި ޖިމް ވިދާޅުވިއެވެ.
"މިއަދު ހުޅަނގުން އެދަނީ ޔޫކްރައިނާ އިޒްރޭލަށް ހަތިޔާރާއި ފައިސާ ދީގެން ދުނިޔޭގެ ހަމަޖެހުން ނަގާލަމުން. މިކަމުގައި ގިނަ ގައުމުތަކަކުން ބައިވެރިވާން މަޖުބޫރުވަމުންދާނަމަ މި ދަތުރު ކުރެވެނީ ތިންވަނަ ބޮޑު ހަނގުރާމައާ ދިމާއަށް" ކިމް ވިދާޅުވިއެވެ.
އެމެރިކާ އާއި ހުޅަނގުން ތުހުމަތު ކުރާ ގޮތުގައި ރަޝިޔާގެ ފައުޖުތަކާއެކު، އުތުރު ކޮރެއާ ސިފައިން ދަނީ ޔޫކްރައިނާ ދެކޮޅަށް ހަނގުރާމަ ކުރަމުންނެވެ. އުތުރު ކޮރެއާ އާއި ރަޝިޔާއިން މިކަން ދޮގު ކޮށްފައެއް ނުވެއެވެ.
