ގްރީސްގެ ސިފައިންނަށް ބޮޑެތި ބަދަލު ގެނަސް އައު ހަތިޔާރު ހޯދައި ހަނގުރާމައަށް ތައްޔާރުވަމުންދާ ކަމަށް ގްރީސްއިން އިއުލާން ކޮށްފިއެވެ.
ގްރީސް ސަރުކާރުގެ ތަރުޖުމާން ޕާވްލޮސް މަރީނާކިސް ވިދާޅުވީ، މަތިންދާ ބޯޓާއި ޑްރޯނާ ދެކޮޅަށް ދިފާޢުވުމުގެ ވައިގެ ދިފާއީ ނިޒާމެއް އުފައްދައި ސިފައިންނަށް ބޮޑެތި ބަދަލުތައް ގެންނާން ނިންމާފައިވާ ކަމަށެވެ.
ސައިބާ ހަނގުރާމައަށް ތައްޔާރު ވުމަކީވެސް އެޖެންޑާގައި އޮތް ކަމެއްކަމަށް އޭނާ ވިދާޅުވިއެވެ. އަދި ސަރުކާރުން ސިފައިންގެ ބޭނުންމަށް އައު ސެޓެލައިޓްގެ ނިޒާމެއް ގާއިމްކޮށް ރައްކާތެރިކޮށް މުވާސަލާތު ކުރެވޭ ގޮތް ހަދާނެ ކަމަށާއި ގްރީސްއިން މިތައްޔާރުވާ ތައްޔާރުވުމަކީ ގްރީސްގެ ތާރީޚުގައި ފެނިފައި ނުވާފަދަ ބޮޑެތި ބަދަލުތަކެއް ކަމުގައި އޭނާ ވިދާޅުވިއެވެ.
ގްރީސްގެ ޑިފެންސް މިނިސްޓަރ ނީކޯސް ޑެންޑިއާސް ވިދާޅުވީ، ގްރީސްގެ ސިފައިން މިހާރު ގެންގުޅޭ 4 ޑްރޯން ސިސްޓަމް، އެއް ނިޒާމެއްގެ ތެރެއަށް އެއްކޮށްލާނެ ކަމަށާއި ބައު ހަތިޔާރު ދޫކޮށް އައު ހަތިޔާރު ހޯދާނެ ކަމަށާއި ޚަރަދު ކުޑަ ކުރުމުގެ ގޮތުން މިހާރު ބޭނުންކުރާ ސިފައިންގެ މަރުކަޒުތަކުގެ ތެރޭން 130 މަރުކަޒެއް ބަންދު ކުރާނެ ކަމަށެވެ.
ގްރީސްއިން ވަނީ 2 ބިލިއަން ޔޫރޯއަށް އިޒްރޭލުން ޑޯމް ޑިފެންސް ސިސްޓަމެއް ގަތުމަށް ވެސް ނިންމާފައެވެ. އަދި އެމެރިކާއިން އެފް15ގެ މަތިންދާބޯޓާއި މަނަވަރުގަތުމަށްވެސް ނިންމާފައި ވެއެވެ.
ގްރީސަކީ، ނޭޓޯގެ މެމްބަރެކެވެ. އެއީ އަބަދުވެސް އަވަށްޓެރި ތުރުކީއަށް ފާރަވެރިވާ ކޯޅުން ބޮޑު ގުޅުމެއްގައި އުޅޭ ދެ އަވަށްޓެރިންނެވެ.
ގްރީސްގައި އެއް އަހަރު ވަންދެން ސިފައިންގެ ތެރޭގައި ޚިދުމަތް ކުރުމަކީ މަޖުބޫރު ކަމެކެވެ.
ގްރީސަކީ އެގައުމުގެ ޖީޑީޕީގެ 3 ޕަސެންޓް އަސްކަރީ ބޭނުންތަކަށް ހޭދަ ކުރާ ޤައުމެކެވެ. ނޭޓޯގެ މެމްބަރުން އެވަރެޖުކޮށް ޚަރަދު ކުރަނީ 2 ޕަސެންޓެވެ.
