ޕާކިސްތާނުގެ މުހިންމު ދީނީ ޖަމާއަތެއް ކަމަށްވާ ކައުންސިލް އޮފް އިސްލާމިކް އައިޑިއޮލޮޖީން އިންޓަނެޓްގައި ބްލޮކްކޮށްފައިވާ ސައިޓުތަކަށް ވަނުމަށް ބޭނުންކުރާ ވާޗުއަލް ޕްރައިވެޓް ނެޓްވޯކް (ވީޕީއެން) ބޭނުންކުރުމަކީ އިސްލާމީ ސުލޫކާއި ޝަރީއަތާ ޚިލާފު ކަމެއް ކަމަށް އިއުލާންކޮށް ފަތުވާއެއް ނެރެފި އެވެ. އެ ކައުންސިލުން ބުނީ ވީޕީއެން ބޭނުން ކުރާ މީހުން އެ ޓެކްނޮލޮޖީ ބޭނުން ކުރަނީ ދައުލަތުން ޤާއިމް ކޮށްފައިވާ ހުރަސްތައް ފަހަނައަޅައި، މަނާ ބަރަހަނާ ކޮންޓެންޓް ލިބިގަތުމަށް ކަމަށާއި އެކަމަކީ އިސްލާމީ އަދި އިޖުތިމާއީ އުސޫލުތަކާ ޚިލާފު ކަމެއް ކަމަށެވެ.
މިފަދަ ކަންކަމަށް ވީޕީއެން ބޭނުންކުރުމަކީ "ފާފައަށް އަރައިގަތުން" ކަމަށާއި އެހެންކަމުން އިސްލާމީ ޝަރީއަތުގެ ތަރަހައިގެ ތެރޭން އެކަމަކީ ބަލައިގަނެވޭނެ ކަމެއް ނޫން ކަމަށް ކައުންސިލްގެ ރައީސް ރާޣިބް ނައީމީ ފާހަގަކުރައްވަ އެވެ.
މި ބަޔާން ނެރެފައިވަނީ ޕާކިސްތާނުގެ ކަމާބެހޭ ފަރާތްތަކުން ސައިބަރ ސެކިއުރިޓީއާއި ޓެރަރިޒަމާ ގުޅޭ ކަންބޮޑުވުންތަކާ ގުޅިގެން މުޅި ގައުމުގައި ފަޔަރވޯލްއެއް ތަންފީޒުކޮށް، ސަރުކާރުގެ މީޑިއާ ރެގިއުލޭޓަރު އިދާރާއިން ވީޕީއެން ރަޖިސްޓްރީ ކުރުމަށް ބާރު އަޅާ ދަނޑިވަޅެއްގައެވެ.
