ހުޅުމާލޭ ހޮސްޕިޓަލްގެ އިމަޖެންސީ ރޫމް (އީއާރް) ބޮޑުކުރުމުގެ މަސައްކަތް ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ.
މި މަސައްކަތް ހަވާލުކުރުމަށް އެއްބަސްވުމުގައި ސޮއިކުރެވުނީ ހުޅުމާލޭ ހޮސްޕިޓަލުގައި ބޭއްވުނު ރަސްމިއްޔާތެއްގައެވެ. އެއްބަސްވުމުގައި ސޮއިކުރެއްވީ މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގު ހަލީމާއި އާރްޑީސީގެ މެނޭޖިންގ ޑިރެކްޓަރ އަލީ ޒުހައިރެވެ.
މި އެއްބަސްވުމުގެ ދަށުން، މިހާރު ހުޅުމާލޭ ހޮސްޕިޓަލުގައި ބޭނުންކުރަމުން އަންނަ 7 އެނދުގެ އިމަޖެންސީ ރޫމް، 14 އެނދުގެ ޖާގައަށް ބޮޑުކުރެވިގެންދާނެއެވެ.
މި މަޝްރޫޢު އާރްޑީސީއާ ހަވާލުކޮށްފައިވަނީ ދެ މަސްދުވަހުގެ ތެރޭގައި މަސައްކަތް ނިންމާ ގޮތަށެވެ. ނަމަވެސް، ހުޅުމާލޭ ހޮސްޕިޓަލަކީ ދުވާލަކު އެތައް ބަޔަކު ޚިދުމަތް ހޯދަމުންދާ ތަނަކަށްވުމުން، އާރްޑީސީގެ އަމާޒަކީ އެ މުއްދަތުގެ ކުރިން މަސައްކަތް ނިންމާލެވޭ ގޮތަކަށް ކަންކަން ތަރުތީބުކޮށްގެން މަޝްރޫއު ކުރިއަށް ގެންދިއުންކަމަށް އެ ކުންފުނިން ވިދާޅުވިއެވެ.
އެއްބަސްވުމުގައި ސޮއިކުރުމަށްފަހު މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާގު ހަލީމް ވިދާޅުވީ، އީއާރް ބޮޑުކުރުމުގެ މަސައްކަތް އާރްޑީސީއާ ހަވާލުކުރީ، އެ ކުންފުނީގެ މަސައްކަތުގެ ތަޖުރިބާއާއި، މިހާރު ކުރިއަށްގެންދާ މަޝްރޫޢުތައް ބޭނުންވާ ފެންވަރަށް އަވަހަށް ނިންމަމުންދާތީ ކަމަށެވެ.
ޓާޝަރީ ހޮސްޕިޓަލެއްގެ ގޮތުގައި ހުޅުމާލޭ ހޮސްޕިޓަލް މިހާރު ހިންގަމުންދާއިރު، އެ ހޮސްޕިޓަލުގެ ތަފާސްހިސާބުތަކުން ދައްކާ ގޮތުގައި މި އަހަރުގެ މިހާތަނަށް އެ ހޮސްޕިޓަލުގެ އިމަޖެންސީއާއި ޖީއޯޕީޑީ ޚިދުމަތް 250،000 އަށް ވުރެ ގިނަ މީހުން ހޯދާފައިވެއެވެ. މި އިމަޖެންސީ ރޫމް ބޮޑުކުރުމުން، އިތުރު މީހުންނަށް ޚިދުމަތް ދެވޭނެކަމަށް ބެލެވެއެވެ.
