ޓޫރިޒަމް ދާއިރާ އިން ލިބޭ ޑޮލަރު ރާއްޖޭގެ ބޭންކްތަކަށް މާރުކުރަން ލާޒިމްކޮށް ހަދާފައިވާ ގަވާއިދަށް އެއްވެސް ބަދަލެއް މިހާތަނަށް ގެނެސްފައި ނުވާނެ ކަމަށް ކަމަށް މޯލްޑިވް މަނިޓަރީ އޮތޯރިޓީ (އެމްއެމްއޭ) އިން މިރޭ ބުނެފި އެވެ.
އެމްއެމްއޭއިން މިކަން ހާމަކުރީ ޑޮލަރު މާރު ކުރަން ހެދި ގަވައިދަށް ބަދަލުތަކެއް ސަރުކާރުން ގެނެސްފިކަމަށް މިރޭ ސޯޝަލް މީޑިއާގައި ޚަބަރު ފަތުރާފައި ވަނިކޮށެވެ.
ރާއްޖޭގެ އިގްތިސާދު ރަނގަޅު ކުރުމުގެ މަގްސަދުގައި ސަރުކާރުން، ޓޫރިޒަމް ދާއިރާ އިން ލިބޭ ޑޮލަރު ރާއްޖޭގެ ބޭންކްތަކަށް މާރުކުރަން ލާޒިމްކޮށް ހަދާފައިވާ ގަވާއިދު ބަދަލު ނުކުރައްވާނެކަން ތަކުރާރުކޮށް ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ރޭ ވަނީ ވިދާޅުވެފައެވެ.
އެމްއެމްއޭގެ ގަވައިދުގައިވާ ގޮތުން ޓުއަރިޒަމް ދާއިރާގެ ހުރިހާ ވިޔަފާރިތަކަކުންވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.
މިގޮތުން މިގޮތުން ރެޒޯޓްތަކާއި ހޮޓާތަކާއި ޓުއަރިސްޓް އުޅަނދުތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. އަދި ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ލާޒިމް ވާނެއެވެ.
ސަރުކާރަށް އެއްއަހަރު ފުރުން ފާހަގަ ކުރުމަށް ރޭ ސޯޝިއަލް ސެންޓަރުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މިދިޔަ އަހަރު އެކަނި ވެސް ޓޫރިޒަމް ސެކްޓާ އަށް 4.5 ބިލިއަން ޑޮލަރުގެ ޖުމްލަ އާމްދަނީއެއް ލިބުނު ކަމަށާއި، އޭގެ ތެރެއިން ރާއްޖޭގެ ބޭންކުތަކަށް މާރުކުރީ 1.5 ޕަސެންޓެވެ.
