މެންޗެސްޓަރ ޔުނައިޓެޑުގެ އައު ކޯޗް ރީބެން އަމޯރިމް ލޮލުގައި އެންމެ 16 އަހަރުގެ ކުޅުންތެރިޔަކު އަޅައިގަނެފިއެވެ.
އަމޯރިމްގެ އިރުޝާދުގެ ދަށުން ޔުނައިޓެޑުން މިއަދު ފުރަތަމަ ޕްރެކްޓިސް ސެޝަން ކުރިއަށް ގެންދިޔައީ އުމުރުން އެންމެ ސޯޅަ އަަހަރުގެ ޑިފެންޑަރު ގޯޑްވިލް ކުކޮންކީ ބައިވެރިކޮށްފައެވެ.
ޖާނުން ވަރުގަދަ ކުކޮންކީއަކީ މެންޗެސްޓަރ ސިޓީއަށް ކުޅެމުން އަންނަ ކްރޭޝިޔާގެ ޑިފެންޑަރު ގްވަޑިއޯލްފަދަ ކުޅުންތެރިއެއްކަމަށް އިނގިރޭސި މީޑިޔާއިން ސިފަ ކުރެއެވެ. މާނައަކީ އެޓޭކްތަކުގައި ވަރުގަދަ، ގޯލާ ރައްޓެހި ޑިފެންޑަރަކަށް ކުކޮންކީ ވުމުގެ ފުރުސަތު ބޮޑު ކަމަށެވެ.
އިނގިރޭސި މީޑިޔާތަކުން ލަފާކުރާ ގޮތުގައި މެންޗެސްޓަރ ޔުނައިޓެޑް، އަމޯރިމްގެ އިރުޝާދުގެ ދަށުން ކުޅޭނީ 3-4-3 ފޯމޭޝަނަށެވެ. އެއީ ސްޕޯޓިންގައިވެސް އޭނާ ކާމިޔާބު ހޯދީ މި ފޯމޭޝަނުގައި ކުޅެގެންނެވެ. މި ފޯމޭޝަނަށް ކުޅޭއިރު ވަރުގަދަ ޑިފެންޑަރުންގެ ޕޫލެއް ބޭނުން ވެއެވެ. ކުކޮންކީއަކީ މި ޕްލޭނުގެ ދަށުން ޕްރެކްޓިހުގައި ބައިވެރިކުރި ކުޅުންތެރިއަކަށް ވެދާނެކަމަށް މެންޗެސްޓަރއަށް ނިސްބަތްވާ ނޫސްތަކުންވެސް ބުނެއެވެ.
އަމޯރިމްގެ އިރުޝާދުގެ ދަށުން ޔުނައިޓެޑް ކުޅޭ ފުރަތަމަ މެޗަކަށް ވާނީ މިމަހުގެ 24 ވަނަ ދުވަހު ރަށުން ބޭރުގައި އިޕްސްވިޗާ ދެކޮޅަށް ކުޅޭ މެޗެވެ.
