އަންމޯލް މީގޮނު ވަނީ މީހުން ޝައުގުވެރިވާ ޖަނަވާރަކަށް ވެފައެވެ. 1500 ކިލޯގެ ބިޔަ ޖަނަވާރަކީ ގެންގުޅެން ޚަރަދު ބޮޑުވިނަމަވެސް ރަނގަޅު އާމްދަނީއެއް ހޯދައިދޭ ސޮރެކެވެ.
އިންޑިއާގެ ހަރިޔާނާގެ ދަނޑުވެރިޔަކު ގެންގުޅޭ އަންމޯލްގެ އަގަކީ ދިވެހި ރުފިޔާއިން ހިސާބު ކުރާނަމަ 41 މިލިއަން ދިވެހި ރުފިޔާއެވެ. އިންޑިއާގެ މީޑިއާއިން ބުނަނީ އަންމޯލުގެ އަގަކީ ނިސްބަތުން 2 ރޯލްސް ރޮއިސް ކާރު ނޫނީ 10 ބެންޒު ކާރުގެ އަގެވެ.
އަންމޯލް ގެންގުޅޭ ހަރިޔާނާގެ ދަނޑުވެރިޔާ ބުނަނީ މަހެއްގެ މައްޗަށް 5ލައްކަ އިންޑިއާ ރުޕީސްގެ އާމްދަނީއެއް އޭނާއަށް ހޯދައިދޭ މި ޖަނަވާރު ވިއްކަން ބޭނުން ނުވާކަމަށެވެ.
އަންމޯލުގެ ކޮއްތަށް ދުވާލަކަށް އިންޑިއާގެ ދޮޅުހާސް ރުޕީސް ހޭދަވެއެވެ. އެސޮރުގެ ދުވާލުގެ ކޮއްތުގެ ތެރޭގައި ހިމެނެނީ، 250 ގްރާމް އާމަންޑާއި 4 ކިލޯ އަންނާރާއި، 30 ވައް ދޮންކޭލާއި، 5 ކިލޯ ކިރާއި، 20 ބިހެވެ. އޭގެ އިތުރުން ސޯޔާ ބީންއާއި ފެހި ވިނައާއި ޒުވާރިއާއި ގިތެޔޮވެސް އެސޮރަށް ކާން ދެވެއެވެ.
ދުވާލަކު ދެފަހަރު ފެންވަރުވައި ހަދައެވެ. ފެންވެރުވުމަށްފަހު އެސޮރުގެ ކަޅުހަމުގެ ދިހުންކަން ގަދަ ކުރުމަށް، ރެވި ތެލާއި އާމަންޑް ތެޔޮ އެއްކޮށްފައި ހުންނަ ތެލެއް އެސޮރުގެ ގައިގައި ވަށައެވެ.
އެސޮރު ދުވާލެއްގެ މައްޗަށް 25 ލީޓަރުގެ ކިރު އުފައްދައެވެ. އެކަމަކު އެސޮރު ގެންގުޅޭ މީހާއަށް އެންމެ ބޮޑު އާމްދަނީއެއް ލިބެނީ އެސޮރުގެ ދަރިފަނިންނެވެ.
ހަފްތާއަކު ދެފަހަރު ނަގާ ދަރިފަނި ވިއްކައިގެން 5 ލައްޕަ ރުޕީސް އޭނާއަށް ލިބެއެވެ. ކޮންމެ ބުރެއްގައި ނަގާ ދަރިފަނިން، 300 އާއި 900 އާ ދެމެދުގެ އަދަދެއްގެ ޖަނަވާރު އުފެއްދޭ ކަމަށް ބުނެއެވެ.
