ޙިޒުބުﷲ އިން ލުބުނާނުން ފޮނުވާލި މިސައިލެއް ހިފާފައިވާ ޓެލް އަވީވްގެ އިމާރާތަކަށް ވެއްޓުމުން ފަލަސްޠީނުގެ ބިމުގައި އިންދާފައިވާ ޒަޔަނިސްޓު ޔަހޫދު ވަޒަންވެރިންގެ މެދުގައި ބިރުވެރިކަމާއި ނުތަނަވަސް ހާލަތެއް އުފެދުނު ކަމަށް އިބްރާނީ ޗެނަލް 12 އިން ރިޕޯޓު ކުރެއެވެ.
ޒަޔަނިސްޓު ވަޒަންވެރިން ބުނަނީ މިސައިލު ވެއްޓުނީ ގާތުރާމާތުގެ ބިލްޑިންގަކަށް ކަމަށެވެ. ހަވީރުގަޑީގައި މި މިސައިލް ވެއްޓުމުން، އެމީހުން ބިރުން މީހުން ފިލަން ދުއްވައި ގަތުމުން ބައެއް މިހުންނަށް އަނިޔާވި ކަމަށްވެސް ރިޕޯޓުކޮށްފައި ވެއެވެ.
އިޒްރޭލުގެ ކޮލްހޭ ރޭޑިއޯއިން މީޑިއާއަށް ނެރުނު ބަޔާނެއްގައި ބުނެފައި ވަނީ ޙިޒުބުﷲގެ މިސައިލް އަމާޒުވުމުން އެމީހުންގެ ރޭޑިއޯ ސްޓޫޑިއޯއަކަށް ގެއްލުން ލިބުނު ކަމަށާއި ބައެއް ޓެކްނިކަލް އިކްއިޕްމެންޓްތައްވެސް ފިހެލި ކަމަށެވެ. އޭގެ ތެރޭގައި ބައެއް ޔަހޫދު މުވައްޒަފުންނަށް ގެއްލުންވި ކަމަށްވެސް ބުންޏެވެ. ނަމަވެސް މީހުންގެ އަދަދެއް ނުބުނެއެވެ.
ޔަހޫދީ ވަޒަންވެރިއަކު ބުނީ އެމީހުންގެ ބައެއް މީހުންނަށް ގެއްލުން ލިބުނީ މިސައިލް ވެއްޓުނު ކަން އެނގިގެން މަޖާކަމަށް ވެގެން ކުޑަދޮރުން ބޯދިއްކޮށްގެން ފޮޓޯ ނަގަން އުޅުމުގެ ތެރޭގައި މިސައިލުން ގޮވައިގެން އައި އެތިގަނޑަކުން ޖެހިފައެވެ.
ޔަހޫދީ ސެޓްލަރު ބުނިގޮތުގައި އާންމު އުސޫލަކީ ސައިރަން އެޅުމުން ވަގުތުން ފިލަން ދުއްވައި ގަތުމެވެ. ލުބުނާނުން އަންނަ މިސައިލް ވެއްޓުމާއި މީހާ ސަލާމަތް ވުމާ ދެމެދު 10 ވަރަކަށް މިނެޓްގެ ވަގުތުކޮޅެއް ލިބެއެވެ. ފަލސްޠީނުގެ ޣައްޒާއިން އަންނަ މިސައިލްތަކުން ސަލާމަތްވާން 15 މިނެޓްގެ ވަގުތުކޮޅެއް ލިބެއެވެ.
