ވަރލްޑް ކަޕް އަދި އޭއެފްސީ އޭޝިޔަން ކަޕް ކޮލިފައިންގައި އަމިއްލަ ދަނޑުގައި އިިންޑޮނޭޝިޔާއިން 2-0 އިން ސައުދީގެ މައްޗަށް މިރޭ ތާރިހީ މޮޅެއް ހޯދައި ވަރލްޑް ކަޕަށް ކޮލިފައިވުމުގެ އުއްމީދު ދަމަހައްޓައިފިއެވެ.
މެޗުގައި އިންޑޮނޭޝިޔާގެ ދެ ލަނޑުވެސް ކާމިޔާބު ކޮށްދިނީ އުމުރުން އެންމެ 20 އަހަރުގެ އެޓޭކިންގ މިޑްފީލްޑަރު މާސެލީނޯ ފާޑިނަންއެވެ.
ގިނަ ކާޑުތަކެއް ފެނިގެންދިޔަ މިމެޗް އިންޑޮނޭޝިޔާއަށް ނިންމާލަން ޖެހުނީ އެއްކުޅުންތެރިޔަކު މަދުކޮށެވެ. އެއީ 89 ވަނަ މިނެޓުގައި އެގައުމުގެ ޒުވާން ޑިފެންޑަރު ޖަސްޓިންގ ހަބްނާއަށް ދެއްކި ރަތްކާޑުގެ ސަބަބުންނެވެ. އުމުރުން 21 އަހަރުގެ ހަބްނާއަކީ ޕްރިމިއަރ ލީގުގައި ވާދަކުރި ވޮލްވަހެމްޓަން ވޮންޑަރާސްގެ ސްކޮޑުގައި ހިމެނުނު ކުޅުންތެރިއެކެވެ. ވޮލްވަހެމްޓަނުން 2023 ވަނަ އަހަރުގެ ޑިސެމްބަރު 2 ވަނަ ދުވަހު އާސެނަލްއާ ދެކޮޅަށް ކުޅުނު މެޗުގައި ހަބްނާއަށް ބެންޗުން ފުރުސަތު ދިނެވެ. ހަބްނާއަކީ ނެދަލޭންޑްސްގެ 20 އަހަރުން ދަށުގެ ގައުމީ ޓީމަށްވެސް ކުޅެފައިވާ ކުޅުންތެރިއެކެވެ.
މިރޭ ސައުދީ ވަރުގަދަ ފޯވާޑުން ހިފެހެއްޓުމުގައި ހަބްނާ ވަނީ އުމުރުން ހަގު ނަމަވެސް، އޭނާގެ ތަޖުރިބާގެ ބޭނުން ވަރަށް ބޮޑަށް ބޭނުން ކޮށްފައެވެ.
އޭޝިޔާގެ ގަދަ ބާރެއްގެ ގޮތުގައި އޮތް ސައުދީގެ މައްޗަށް އިންޑޮނޭޝިޔާއިން ހޯދުމާއެކު ގްރޫޕް "ސީ" ގައި ސައުދީ، އިންޑޮނޭޝިޔާ، ޗައިނާ އަދި އޮސްޓްރޭލިޔާ ވަނީ ޕޮއިންޓުގެ ގޮތުން އެއްވަރުވެފައެވެ. ކޮންމެ ގައުމަކަށްވެސް ލިބިފައި ވަނީ 6 ޕޮއިންޓެވެ. މި ގްރޫޕުގެ އެއްވަނައިގައި އޮތީ 16 ޕޮއިންޓާއެކު ޖަޕާނެވެ.
2026 ވަނަ އަހަރު އެމެރިކާގައި ބޭއްވުމަށް ހަމަޖެހިފައިވާ ވަރލްޑް ކަޕަށް އޭޝިޔާ ބައްރުން ކޮލިފައިވާނީ، މިހާރު ކޮލިފައިން ކުޅޭ 4 ގްރޫޕުގެ ތެރެއިން ކޮންމެ ގްރޫޕަކުން އެންމެ ގިނަ ޕޮޮއިންޓް ހޯދާ 2 ގައުމެވެ. މީގެ އިތުރުން މި ހަތަރު ގްރޫޕުން 3 އަދި 4 ވަނަ ހޯދާ ގައުމުތައް 2 ގްރޫޕަކަށް ބަހާލުމަށްފަހު ކޮންމެ ގްރޫޕަކުން އެއްވަނަ ހޯދާ ދެ ގައުމުގެ ދެމެދުގައި 2 ލެގުގެ ފައިނަލެއް ކުޅެ، ކުރި ހޯދާ ގައުމަކަށްވެސް ކުރިއަށް އޮތް ވަރލްޑް ކަޕުން ޖާގަ ލިބޭނެއެވެ.
