ވަރލްޑް ކަޕް އަދި އޭޝިޔަން ކަޕް ކޮލިފައިންގައި ވަރުގަދަ ދެކުނު ކޮރެޔާއާ 1-1 އިން އެއްވަރުކޮށް ފަލަސްތީނުން ފުޓްބޯޅައިގެ ދުނިޔެ ސިއްސުވާލައިފިއެވެ.
ޖޯޑަންގައި ކުޅުނު މިމެޗުގައި ފުރަތަމަ ލީޑް ނެގީވެސް ފަލަސްތީނުންނެވެ. މިލަނޑު 12 ވަނަ މިނެޓުގައި ކާމިޔާބު ކޮށްދިނީ ޒައިދު ގުންބާރެވެ. އެކަމަކު އޭގެ 4 މިނެޓް ފަހުން ކޮރެޔާގެ ތަޖުރިބާކާރު ކުޅުންތެރިޔާ ސޮންގ ހިއުން މިން ލަނޑެއް ޖަހައި އެގައުމަށް އެއްވަރު ކޮށްދިނެވެ.
ކޮރެޔާއިން ގިނަ ވަގުތު ބޯޅަ ހިފަހައްޓައި، ގިނަ ހަމަލާތައް އުފެއްދިނަމަވެސް ފަަލަސްތީނުން ވަނީ ރޭވުންތެރިކަމާއެކު ދިފާއީ ވަރުގަދަ ކުޅުމެއް ދައްކައި ކައުންޓަރ އެޓޭކްތަކުގައި ކޮރެޔާ ހާސްކޮށްލާފައެވެ.
ވަރލްޑް ކަޕް ކޮލިފައިން ގްރޫޕް "ބީ" ގެ ކުރީގައި ކޮރެޔާ އޮތީ މިހާތަނަށް ކުޅުނު 6 މެޗުން 14 ޕޮއިންޓް ހޯދައިގެންނެވެ. ފަލަސްތީނު 5 ވަނައިގައި އޮތީ 3 ޕޮއިންޓާއެކުވެ. މި ގްރޫޕުގެ ދެވަނައިގައި 11 ޕޮއިންޓާއެކު އޮތީ އިރާގެވެ. ތިންވަނައިގައި ޖޯޑަން އޮތްއިރު، ހަތަރުވަނައިގައި އޮތީ އޮމާނެވެ. ގްރޫޕު ފުލުގައި 3 ޕޮއިންޓާއި ގެއްލުން 6 ލަނޑާއެކު އޮތީ ކުވައިތެވެ.
ސަޔްހޫނީ އިޒްރޭލުން ފަލަސްތީނުގެ ނަސްލު ނައްތާލުމަށް ހިންގަމުންދާ ގަތުލް އާންމުގެ ސަބަބުން ވޭނާއި ހިތްދަތިކަން އިހްސާސް ކުރަމުންދާ އެތައް ހާސް ފަލަސްތީނު ރައްޔިތުން ވަނީ، ކޮރެޔާ އަތުން ފަލަސްތީނު ގައުމީ ފުޓްބޯޅަ ޓީމު ޕޮއިންޓެއް ހޯދުމުން އުފާވެރިކަމާއި ހިތްވަރުގެ ޝުއޫރުތައް ވަރަށް ބޮޑަށް ފާޅުކޮށްފައެވެ.
