ދުނިޔޭގެ ޔަހޫދީ މުޖުތަމަޢަށް ދެއްވި ވީޑިއޯ ޚިޠާބުގައި އީރާނުގެ ސްޓްރެޓެޖިކް އެފެއާޒް ބަލަހައްޓަވާ ނައިބު ރައީސް މުހައްމަދު ޖަވާދު ޒަރީފް ވަނީ ޒަޔަނިޒަމަކީ އިލާހީ ސުންނަތަށް ޚިޔާނާތްތެރިވާ ނަސްލީ ތަފާތުކުރުމާއި އިންސާނިއްޔަތުގެ މެދުގައި ނަފްރަތު އުފެއްދުމަށް ބިނާކޮށްފައިވާ ފިކުރެއް ކަމަށް ވިދާޅުވެ ޒަޔަނިސްޓުންނަށް ފާޑުވިދާޅުވެފަ އެވެ.
ޒަރީފް ވަނީ ހޮލޮކޯސްޓްގެ ޝިކާރައަކަށް ވެފައިވާ މީހުންގެ ޒިކުރާގެ ނާޖާއިޒު ބޭނުން ހިފައިގެން ނަސްލީ ތަފާތު ކުރުން ފުޅާކުރުމުގެ އިސްތިއުމާރީ އެޖެންޑާއެއް ޒަޔަނިސްޓުން ކުރިއަށް ގެންދާ ކަމަށް ތުހުމަތު ކުރައްވާފަ އެވެ.
ޒަރީފްގެ ޚިޠާބު ފެއްޓެވީ، މޫސާގެފާނަށް އީމާންވި މީހުންނާއި އެހެން އިބްރާހީމީ ދީންތަކުގެ އަހުލުވެރިންނަށް އިޙްތިރާމް އަދާ ކުރައްވަމުންނެވެ.
ޒަރީފީ ވިދާޅުވީ ތާރީޚުގެ ހުރިހައި ފައްތަރެއްގައިވެސް ޔަހޫދުން ހާލުގައި ޖެހުނު ހިނދު އީރާނުން އެހީތެރިވެ ދީފައިވާނެ ކަން ތާރީޚީ ހެކިތަކުން ދައްކާފައުވާ ކަމަށެވެ.
"އަޅުގަނޑުމެންގެ ގައުމަކީ ދެ ހާހަށް ވުރެ ގިނަ އަހަރު ވަންދެން އެކި ދީންތަކާއި ސަގާފަތްތަކާއި ނަސްލުތަކުގެ މެދުގައި ސުލްހަވެރިކަމާއެކު އެއްތަނެއްގައި ދިރިއުޅެފައިވާ ހަޟާރީ ރަމްޒެއް،" ޒަރީފް ފާހަގަކުރެއްވި އެވެ.
"މީގެ 2600 އަހަރު ކުރިން ބެބިލޯނުގެ އަޅުވެތިކަމުގައި ތިބި ޔަހޫދީން މިނިވަން ކުރުމުން ފެށިގެން ދެވަނަ ބޮޑު ހަނގުރާމައިގެ ދުވަސްވަރު ނާޒީންގެ ފިހެލުންތަކުން ފިލައިގެން ދިޔަ މީހުންނަށް މަރުހަބާ ކިޔުމާ ހަމައަށް އީރާނުން އަބަދުވެސް ވަނީ އަނިޔާވެރިންނަށް އަތް ފުޅާކޮށް މަރުހަބާ ކިޔާފައި. އަދި މި ސަގާފަތް މިއަދުވެސް ކުރިއަށްދާއިރު، އުދުވާނީ އަމަލުތަކާއި ނަސްލީ ތަފާތުކުރުމުން ގެދޮރު ދޫކޮށްފައިވާ ފަލަސްތީނާއި، ލުބުނާނާއި، ސީރިޔާ މީހުންނަށް އަޅުގަނޑުމެން އެހީތެރިވެދެމުން މިދަނީ." ޒަރީފް ވިދާޅުވިއެވެ.
ޒަރިފް ވަނީ ޒަޔަނިޒަމަކީ އިސްތިއުމާރީ އަދި ނަސްލީ ތަފާތުކުރުންތަކުގެ އެޖެންޑާ ފޮރުވުމަށް ދީން ނިވާ ފަތްގަނޑަކަށް ބޭނުން ކުރާ ހަރަކާތެއް ކަމުގައި ވިދާޅުވެފައެވެ.
ވަރަށްވެސް ފުރިހަމަ ލިޔުމެއް