ރާއްޖޭގައި ވެކްސިން ޖެހި 19 މީހަކަށް އެޑްމިޓްކޮށްގެން ފަރުވާ ދިންކަމަށް ހެލްތް އިމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.
އެޗްއީއޯސީން މިރޭގައި ބޭއްވި ނޫސްވެރިންގެ ބައްދަލުވުމުގައި މިކަން ހާމަކޮށްފައިވަނީ ޑރ. އަޙްމަދު ފައިސަލެވެ. ޓެކްނިކަލް އެޑްވައިޒަރީ ގުރޫޕްގެ ޗެއަރޕާސަންގެ މަގާމު ފުރުއްވަމުން ގެންދަވާ ޑރ.ފައިސަލް ވިދާޅުވީ، ކޮވިޑްގެ ބަލިމަޑުކަމުން އަރައިގަތުމަށް ވެކްސިން ޖެހި މީހުންގެ ތެރެއިން އެކި އަސަރު ކޮށްގެން ނަވާރަ މީހަކަށް އެޑްމިޓްކޮށްގެން ފަރުވާދީފައިވާ ކަމަށެވެ.
ފައިސަލް އިތުރަށް ވިދާޅުވީ، އެ ނަވާރަ މީހުންނަށް ދިމާވެފައިވަނީ، ބޯ އެނބުރުން ނުވަތަ އެލާޖިކް ރިއެކްޝަންގެ ތެރެއިން ގައިގައި ބިހި ނެގުންކަމަށެވެ.
ޑރ.ފައިސަލް ވަނީ ވެކްސިން ޖެހުމަށްފަހު ހުންއައިސް ގިނަ ދުވަސް ވާނަމަ ޑޮކްޓަރަށް ދައްކައިގެން އެ އަލާމަތްތައް ފެންނަ ސަބަބު ދެނެގަތުމަށް އިލްތިމާސްކުރައްވާފައެވެ.
ކޮވިޑްގެ ބަލިމަޑުކަމުން ސަލާމަތްވުމަށްޓަކައި، ވެކްސިން ދިނުމުގެ ޕްރޮގުރާމް ސަރުކާރުން ފެށިތާ 28 ދުވަސް ވެފައިވާއިރު މިހާތަނަށް 111000 އަށްވުރެ ގިނަ މީހުން ވަނީ ވެކްސިން ޖަހާފައެވެ.
