ވަރލްޑް ކަޕް ކޮލިފައިން ކެމްޕެއިނުގައި މިފަހަރު ބްރެޒިލް ގައުމީ ޓީމަށް ލަނޑެއް ޖަހައި ދިނުމަށް ވިނީޝިއަސް ޖޫނިއަރ ކުރަމުންް އަންނަ އިންތިޒާރު އަނެއްކާވެސް ދިގުވާގޮތް ވެއްޖެއެވެ.
ބްރެޒިލް ސަޕޯޓަރުން ކުރިމަތީގައި ރާއްޖޭގެ ގަޑިން މިއަދު ހެނދުނު އުރުގުއޭއާ ވާދަކޮށް ބްރެޒިލް ނިންމާލަން ޖެހުނީ 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އުރުގުއޭއިންނެވެ. މިއީ ދެވަނަ ހާފުގެ 55 ވަނަ މިނެޓުގައި ބްރެޒިލްގެ ސެންސާކަލްގެ ބޭރުން ފޭޑް ވަލްވާޑޭ ފޮނުވާލި ބާރު ހަމަލާއަކުން ކާމިޔާބު ކުރި ހިތްގައިމު ލަނޑެކެވެ. ބްރެޒިލަށް އެއްވަރު ކޮށްދިނީ 62 ވަނަ މިނެޓުގައި މިޑްފީލްޑަރު ޖާސަންއެވެ.
މިފަހަރުގެ ވަރލްޑް ކަޕް ކޮލިފައިންގައި ބްރެޒިލުން މިހާތަނަށް 12 މެޗް ކުޅެފައިވާއިރު، ވިނީޝިއަސްއަށް އެންމެ ލަނޑެއްވެސް ކާމިޔާބު ކުރެވިފައެއް ނުވެއެވެ. ބްރެޒިލް ގައުމީ ޓީމަށް މިހާތަނަށް ކުޅެދިން 37 މެޗުގައި ވިނީޝިއަސްއަށް ކާމިޔާބު ކުރެވިފައި ވަނީ 5 ލަނޑެވެ.
މެޗުގެ އުސްއަލިތައް:
https://www.youtube.com/watch?v=-hWBAuxF1eY
ވަރލްޑް ކަޕް ކޮލިފައިން ދެކުނު އެމެރިކާ ޒޯނުގެ މެޗުތައް މިއަހަރަށް ނިމުނުއިރު، 12 މެޗުން 25 ޕޮއިންޓް ހޯދައިގެން އެއްވަނައިގައި އޮތީ އެންމެފަހުގެ ވަރލްޑް ކަޕުގެ ޗެމްޕިއަން އާޖެންޓީނާއެވެ. ދެވަނައިގައި 20 ޕޮއިންޓާއެކު އޮތީ އުރުގުއޭވެ. ބްރެޒިލް 18 ޕޮއިންޓާއެކު އޮތީ 5 ވަނައިގައެވެ.
