މެންޗެސްޓާ ސިޓީއާއެކު އާ ކޮންޓްރެކްޓެއްގައި އެ ކްލަބުގެ ކޯޗު ޕެޕް ގާޑިއޯލާ ސޮއިކޮށްފިއެވެ.
ގާޑިއޯލާ, އެންމެ ފަހުން ސިޓީއާއެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާއިރު, ގިނަ ބަޔަކު އައީ އޭނާ ސިޓީ ދޫކޮށްލާނެ ކަމަށް ލަފާ ކުރަމުންނެވެ. ނަމަވެސް ފުޓުބޯޅަ މީޑިއާއެއް ކަމުގައިވާ އީއެސްޕީއެންއިން ވަނީ ގާޑިއޯލާ, ސިޓީއާއެކު ހަދާފައިވާ ކޮންޓްރެކްޓް އާ ކޮށްފިކަން ޔަގީން ކޮށްދީފައެވެ.
ގާޑިއޯލާ ސޮއިކުރި އާ ކޮންޓްރެކްޓަކީ ދެން އަންނަ ސީޒަނުގެ ނިޔަލަށް ހަމަވާ ކޮންޓްރެކްޓެކެވެ. އެ ސީޒަން ނިމެންދެން ގާޑިއޯލާ އެ ކްލަބުގައި މަޑުކޮށްފިނަމަ އެއީ އޭނާ ސިޓީއަށް ކޯޗުކަން ކޮށްދިން 10 ވަނަ ސީޒަނަށް ވެގެންދާނެއެވެ.
ގާޑިއޯލާއަކީ ސިޓީގެ ތާރީހުގައި އެންމެ ކާމިޔާބު ކޯޗުކަމަށްވާ އިރު, އޭނާ އެ ކްލަބާއެކު އާ ކޮންޓްރެކްޓެއްގައި ސޮއި ކުރުމަކީ ކްލަބުގެ ސަޕޯޓަރުންނަށް ލިބިގެންދިޔަ ބޮޑު ހިތްހަމަޖެހުމެކެވެ. މި ސީޒަން ނިމުމުން ސިޓީގެ ފުޓުބޯޅަ ޑިރެކްޓަރު މަގާމުން ދުރުވާއިރު, ގާޑިއޯލާ އެ ކްލަބުގެ ހުންގާނުގައި ހުރުމަކީ އެ ކްލަބުގެ ކުރި މަގަށް ވަރަށް މުހިއްމު ކަމެކެވެ.
ގާޑިއޯލާ, 2016 ވަނަ އަހަރު ބަޔާން މިއުނިކުން ސިޓީއާ ގުޅުނު ފަހުން ވަނީ އެ ކްލަބަށް ޖުމްލަ 15 ތަށި ކާމިޔާބު ކޮށްފައެވެ. އޭގެ ތެރެއިން އެންމެ ފާހަގަކޮށްލެވެނީ, ކްލަބުގެ ތާރީހުގައި ފުރަތަމަ ފަހަރަށް ކާމިޔާބު ކުރި ޗެމްޕިއަންސް ލީގުގެ ތަށްޓެވެ. އޭގެ އިތުރުން އޭނާ ވަނީ އެ ކްލަބަށް 6 ޕްރިމިއާ ލީގު ތަށި ކާމިޔާބު ކޮށްފައެވެ.
