ވަކި ޕާޓީއެއްގެ ޓިކެޓުގައި ރައްޔިތުންގެ މަޖިލީހަށް ހޮވުމަށް ފަހު އެ މެމްބަރަކަށް ޕާޓީ ބަދަލު ކުރުމުގެ ފުރުސަތު އޮވެގެން ވާނެކަމަށް ދެކިވަޑައި ނުގަންނަވާކަމަށް ދިއްގަރު ދާއިރާގެ މެމްބަރު އަހުމަދު ނާޒިމް މިއަދު ވިދާޅުވެއްޖެ އެވެ.
މަޖިލީހުގެ ނައިބް ރައީސްކަންވެސް މިދައުރުގައި ކުރައްވަމުން ގެންދަވާ ނާޒިމް މިހެން ވިދާޅުވީ ޕާޓީ ބަދަލު ކުރުމުން، އަދި ޕާޓީއިން ވަކި ކުރުމުން މަޖިލީހުގެ ގޮނޑި ގެއްލޭ ގޮތަށް ޤާނޫނު އަސާސީއަށް ބަދަލު ގެންނަން ހުށަހެޅި އިސްލާހުގެ ބަހުސްގައި ވާހަކަފުޅު ދައްކަވަމުންނެވެ.
ނާޒިމް ވިދާޅުވީ އެންޓި ޑިފެކްޝަން ގާނޫނު އޮތީ ގާނޫނުއަސާސީގައި މަޖިލީހުގެ މެމްބަރެއްގެ ގޮނޑި ގެއްލޭނެ ހާލަތްތައް ބަޔާންކޮށްފައި އޮތް އިރު އޭގެއިން ހާލަތަކަށް ބައްދަލު ނުވާގޮތަކަށް ކަމަށެވެ.
ނާޒިމް ވިދާޅުވީ މަޖިލިސް މެމްބަރުންނަކީ ގަނެ ވިއްކާ މުދާގަނޑަކަށް ވެގެން ނުވާނެކަމަށާއި، އެ ނޫންނަމަ ބޭނުންވާ ތަރައްގީ ރައްޔިތުންނަށް ގެނެސްނުދެވޭނެކަމަށެވެ.
މި އިސްލާހަށް ވޯޓަށް އެހުން މިއަދު ހަވީރަށް ވަނީ ތަވާލް ކޮށްފައެވެ.
މި އިސްލާހާ ދެކޮޅަށް އިދިކޮޅު އެމްޑީޕީއިން ގެންދަނީ މަޖިލިސް ދޮށުގައި އިހްތިޖާޖު ކުރަމުންނެވެ.
މިހާރު އަމަލު ކުރާ އެންޓި ޑިފެކްޝަން ގާނޫނުގައި ބުނަނީ، ސިޔާސީ ޕާޓީއަކުން މެންބަރަކު ވަކިކޮށްފިނަމަ، ވަކި ކުރީ ރަނގަޅަށްތޯ ކަނޑައަޅަން އެމީހަކަށް ކޯޓަށް ދެވިދާނެ ކަމަށެވެ. ވަކި ކުރީ ރަނގަޅަށް ކަމަށް ކޯޓުން ނިންމައިފި ނަމަ އޭނާގެ ގޮނޑި ނުގެއްލޭނެ ކަމަށް ގާނޫނު އަސާސީގައި ވަނީ ބުނެފައެވެ.
