އެމެރިކާއިން ފޯރުކޮށްދީފައިވާ ބެލަސްޓިކް މިސައިލުން ފުރަތަމަ ފަހަރަށް ޔޫކްރައިނުން ރަޝިޔާއަށް ހަމަލާދީފިއެވެ.
މިކަން އެމެރިކާގެ ދެ އޮފިޝަލަކު ސީއެންއެން ވަނީ ކަށަވަރު ކޮށްދީފައެވެ.
އެމެރިކާއިން ފޯރުކޮށްދިން ދުރު ރާސްތާ މިސައިލުން ރަޝިޔާއަށް ޔޫކްރައިނުން ހަމަލާ މިދިނީ، ރަޝިޔާއާ ދެކޮޅަށް މި މިސައިލްތައް ބޭނުން ކުރުމުގެ ހުއްދަ އެމެރިކާގެ ރައީސް ޖޯ ބައިޑަން ދެއްވިތާ 2 ދުވަސް ފަހުންނެވެ.
ހަމަލާއާ ގުޅިގެން ރަޝިޔާގެ ޑިިފެންސް މިނިސްޓްރީއިން ނެރެފައިވާ ބަޔާނުގައި ބުނީ ޔޫކްރައިނުން 6 ބެލަސްޓިކް މިސައިލު ބޭނުން ކޮށްގެން މިއަދު ރަޝިޔާގެ ބްރިޔަންސްކުގައި ހުންނަ ސިފައިންގެ މަރުކަޒަކަށް ހަމަލާ ދިނުމަށް މަސައްކަތް ކޮށްފައިވާ ކަމަށެވެ. ބްރިޔަންސް ސަރަހައްދަކީ ރަޝިޔާގެ ވެރިރަށް މޮސްކޯއާ 230 ކިލޯ މީޓަރު ދުރުގައި އޮންނަ ސަރަހައްދެކެވެ.
ރަޝިޔާގެ އެއަރ ޑިފެންސުން ބުނެފައި ވަނީ އަމާޒަށް ވާސިލުވުމުގެ ކުރިން 5 މިސައިލު ބެލަސްޓިކް ވައްޓާލި ކަމަށާއި އަނެއް މިސައިލު އަމާޒަށް ވާސިލުވުމުގެ ކުރިން ގޮވީ ކަމަށެވެ.
