މެލޭޝިއާގެ އެއަރލައިނެއް ކަމުގައިވާ ވޯލްޑް ކާގޯ އެއަރލައިންސް، މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފޯރުކޮށްދޭ ސީޓު އެއަރ ކާގޯ ޚިދުމަތާ ގުޅިއްޖެއެވެ.
ސީޓު އެއަރ ކާގޯ ޚިދުމަތަކީ ކަނޑު މަގުން ދިވެހިރާއްޖެއަށް މުދާ ގެނެސް، އެއަށްފަހު އެކި ޤައުމުތަކަށް ވައިގެ މަގުން ފޮނުވުމަށް މަގުފަހިކޮށްދޭ ޚިދުމަތެކެވެ. މި ޚިދުމަތަކީ އެމްޕީއެލް، މޯލްޑިވްސް ސްޓޭޓް ޝިޕިންގ (އެމްއެސްއެސް)، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)، އަދި ބައިނަލްއަޤްވާމީ އެއަރލައިންތަކުގެ މެދުގައި ގުޅިގެން ކުރިއަށްގެންދާ މަސައްކަތެކެވެ.
ސީޓު އެއަރ ކާގޯ ޚިދުމަތުން މުދާ އެކްސްޕޯޓްކުރާ ޤައުމުތަކުން ވަކި މަންޒިލްތަކަކަށް މުދާ ފޮނުވުމަށް އަވަސް ގޮތެއް ހޯދައިދެއެވެ. ދިވެހިރާއްޖެއަށް މީގެ އެއް މުހިންމު ފައިދާއަކީ ގިނަ ޤައުމުތަކަށް، ޚާއްޞަކޮށް ޔޫރަޕުގެ އެކި ޤައުމުތަކަށް ދަތުރުކުރާ ފްލައިޓްތައް ގިނަވުމެވެ.
މި ޚިދުމަތުން އުފުލާ މުދާތަކަކީ މައިގަނޑު ގޮތެއްގައި ބަންގްލަދޭޝްއިން އަންނަ މުދާތަކެވެ. އަދި އާންމު ގޮތެއްގައި މި މުދާތައް ކަނޑު މަގުން ގެނެސް، އެއަށްފަހު މަންޒިލަށް ވައިގެ މަގުން ފޮނުވެއެވެ.
ވޯލްޑް ކާގޯ އެއަރލައިންސް އެމްޕީއެލްގެ ސީޓު އެއަރ ކާގޯ ޚިދުމަތާ ގުޅިފައިވާއިރު، މިހާތަނަށް މި ޚިދުމަތް ފޯރުކޮށްދިނުމަށް ޖުމްލަ 12 އެއަރލައިނާއެކު އެމްޕީއެލްއިން ގުޅިފައިކަމަށް އެކުންފުނިން ހާމަކޮށްފައިވެއެވެ.
ސީޓު އެއަރ ކާގޯ ޚިދުމަތް ތަޢާރަފުކުރުމަކީ މިހާރުގެ ސަރުކާރު ވެރިކަމާ ހަވާލުވުމަށްފަހު އިޤްތިޞާދީ ހާލަތު އިޞްލާޙުކުރުމަށް އެޅި ފުރަތަމަ ފިޔަވަޅުތަކުގެ ތެރެއިން އެއް ފިޔަވަޅެވެ.
